అల్ట్రా స్టైలిష్ లుక్కులో లెజెండరీ యాక్టర్స్..!

చిత్రపరిశ్రమలో హీరోల మధ్య ఎలాంటి పోటీతత్వం కనిపిస్తుందో అందరికి తెలిసిందే. కానీ అదంతా రీల్ లైఫ్ వరకే. నిజజీవితంలో అలా ఉండదు. సినీహీరోలు ఎంత స్నేహంగా ఉంటారో కొందరి స్నేహాన్ని చూసి అలా చెప్పేయొచ్చు. ముఖ్యంగా నాటితరం హీరోలు ఇప్పుడు సీనియర్స్ గా ఇంకా ఇండస్ట్రీలో కొనసాగుతున్నారు. కొందరు ఇప్పుడున్న యువహీరోలకు ఫాదర్స్ లేదా గురువు పాత్రల్లో నటిస్తుండగా.. కొందరు మాత్రం ఇంకా హీరోలుగానే కంటిన్యూ అవుతున్నారు. అందులోను లేట్ వయసులో కూడా నేటి జనరేషన్ హీరోలకు స్ఫూర్తిగా నిలుస్తున్నారు. అలాంటి మంచి స్నేహితులు సూపర్ స్టార్ తలైవా రజినీకాంత్ - టాలీవుడ్ డైలాగ్ కింగ్ మోహన్ బాబు.

వీరిద్దరూ ఎలాంటి స్నేహితులు అనేది ప్రేక్షకులకు ప్రత్యేకంగా చెప్పే అవసరం లేదు. ఎందుకంటే పలు దశబ్దాల కాలంగా వారు మిత్రులుగా స్ఫూర్తి నింపుతున్నారు. అయితే ఇప్పుడు వయసు మీద పడటంతో అలాగే షూటింగ్స్ కారణంగా కలుసుకోవడం అరుదుగా జరుగుతుంది. తాజాగా డైలాగ్ కింగ్ - సూపర్ స్టార్ కలిసిన ఓ ఫోటోలు సోషల్ మీడియాలో వైరల్ అవుతున్నాయి. అదికూడా తెల్లని చొక్కా - పంచకట్టుతో ఇద్దరూ డైనమిక్ గా ఫోటోలో మెరిసిపోతున్నారు. అయితే ఇద్దరూ స్టైల్ పరంగా అసలు తగ్గలేదు. ఎందుకంటే అభిమానులకు వారిని అలా చూస్తేనే సంతోషం కలుగుతుంది. ఇన్నేళ్లలో రజినీకాంత్ - మోహన్ బాబు ఎన్నడూ మనస్పర్థలు అనే మాటకు వారి స్నేహంలో తావివ్వలేదు.

వీరిద్దరూ కలిసి నటించిన బ్లాక్ బస్టర్ మూవీ పెదరాయుడు సినిమా గుర్తుకు వస్తుందంటూ ఫ్యాన్స్ జ్ఞాపకాల్లోకి వెళుతున్నారు. అయితే రజినీకాంత్ ఎప్పుడు హైదరాబాద్ వచ్చినా అలాగే మోహన్ బాబు ఎప్పుడైనా చెన్నై వెళ్లినా ఖచ్చితంగా ఇంటికి వెళ్లి మరీ కలుసుకుంటారు. తాజాగా సూపర్ స్టార్ - డైలాగ్ కింగ్ కలుసుకున్నారు. ఈ సందర్బంగా వారిద్దరూ కలిసి ఫోటోలకు పోజిచ్చారు. ఇద్దరూ వైట్ అండ్ వైట్ ధరించి సూపర్ స్టైలిష్ గా కనిపిస్తున్నారు. అదిగాక ఇంకాస్త యవ్వనంగా కూడా కనిపించడం విశేషం. చెరగని చిరునవ్వులతో ఇద్దరూ స్టార్స్ వారి స్నేహం ఎలాంటిదో వారెంత ఆప్యాయతగా ఉంటారో ఫోటోలో వారి చనువు బట్టి చెప్పవచ్చు. ప్రస్తుతం ఈ సూపర్ స్టార్స్ ఇద్దరూ సోషల్ మీడియాలో హాట్ టాపిక్ అయ్యారు. ఓవైపు రజినీ ఆల్రెడీ పాన్ ఇండియా స్టార్ కాగా.. మోహన్ బాబు త్వరలోనే 'సన్ ఆఫ్ ఇండియా' మూవీతో పాన్ ఇండియా డెబ్యూ చేయనున్నారు. ప్రస్తుతం పిక్స్ హల్చల్ చేస్తున్నాయి.