బిగ్ అప్డేట్: 'లైగర్' లో లెజండరీ బాక్సర్ మైక్ టైసన్..!

డేషింగ్ డైరెక్టర్ పూరీ జగన్నాథ్ - సెన్సేషనల్ స్టార్ విజయ్ దేవరకొండ కాంబినేషన్ లో తెరకెక్కుతున్న లేటెస్ట్ మూవీ ''లైగర్''. 'సాలా క్రాస్ బ్రీడ్' అనేది దీనికి ట్యాగ్ లైన్. మార్షల్‌ ఆర్ట్స్‌ కథాంశంతో హై వోల్టేజ్ యాక్షన్ ఎంటర్టైనర్ గా ఈ చిత్రాన్ని తీర్చిదిద్దుతున్నారు. ఇప్పటికే విడుదలైన వీడీ ఫస్ట్ లుక్ అనూహ్య స్పందన తెచ్చుకుంది. ఈ క్రమంలో పూరీ జగన్నాథ్ పుట్టిన రోజు సందర్భంగా మేకర్స్ తాజాగా ఓ బిగ్ అప్డేట్ తో వచ్చారు.

'లైగర్' చిత్రంలో ప్రపంచ ప్రఖ్యాత బాక్సర్ మైక్ టైసన్ నటించబోతున్నారని చిత్ర బృందం ప్రకటించింది. బాక్సింగ్ లో హిస్టరీ క్రియేట్ చేసిన ది గ్రేట్ టైసన్.. ఈ ప్రతిష్టాత్మకమైన సినిమా ద్వారా మొట్ట మొదటిసారిగా ఇండియన్ సిల్వర్ స్క్రీన్ మీద కనిపించబోతున్నారని వెల్లడించారు. ఈ సందర్భంగా విడుదల చేసిన అనౌన్స్ మెంట్ వీడియోలో విజయ్ దేవరకొండ - మైక్ టైసన్ ల హాఫ్ ఫేస్ తో డిజైన్ చేసిన లుక్ ఆకట్టుకుంటోంది.

లెజెండరీ బాక్సర్ మైక్ టైసన్ 'లైగర్' సినిమాలో కీలక పాత్ర పోషిస్తారని కొన్ని నెలల కిందటే రూమర్స్ వచ్చాయి. ఇప్పుడు చిత్ర బృందం వాటిని నిజం చేస్తూ అధికారిక ప్రకటన ఇచ్చారు. వరల్డ్ బాక్సింగ్ చరిత్రలోనే మైక్ టైసన్ ఓ సంచలనం అని చెప్పాలి. తన పంచ్ లతో ప్రత్యర్ధులను మట్టికరిపించి ఏ బాక్సర్ సాధించనని మెడల్స్ సాధించి సరికొత్త రికార్డును క్రియేట్ చేసాడు. అయితే 1997లో ఆవేశంతో తోటి బాక్సర్ హోలీఫీల్డ్ చెవి కొరికి బాక్సింగ్ ఆట నుంచి సస్పెండ్ చేయబడ్డాడు.

బాక్సింగ్ హిస్టరీలోనే సెన్సేషనల్ గా మిగిలిపోయిన మైక్ టైసన్.. ఇప్పుడు యంగ్ సెన్సేషన్ విజయ్ దేవరకొండ సినిమా 'లైగర్' లో నటిస్తుండటంతో అంచనాలు రెట్టింపు అవుతున్నాయి. విజయ్ ఈ సినిమాలో ప్రొఫెషనల్ బాక్సర్ గా కనిపించడానికి మిక్స్డ్ మార్షల్ ఆర్ట్స్ లో శిక్షణ కూడా తీసుకున్నారు. జాకీచాన్ చిత్రాలకు వర్క్ చేసిన ప్రముఖ హాలీవుడ్ స్టంట్ కొరియోగ్రాఫర్ ఆండీ లాంగ్ ఈ సినిమాలో బాక్సింగ్ ఎపిసోడ్స్ డిజైన్ చేస్తున్న సంగతి తెలిసిందే.

ప్రస్తుతం గోవా లో జరుగుతున్న షూటింగ్ షెడ్యూల్ లో బాక్సింగ్ ఛాంపియన్ షిప్ కు సంబంధించిన ఎపిసోడ్స్ ని షూట్ చేస్తున్నారు. ''లైగర్'' చిత్రాన్ని పూరి కనెక్ట్స్ మరియు ధర్మ ప్రొడక్షన్స్ బ్యానర్స్ మీద పూరి జగన్నాధ్ - ఛార్మి కౌర్ - కరణ్ జోహార్ మరియు అపూర్వ మెహతా కలసి నిర్మిస్తున్నారు. ఇందులో విజయ్ దేవరకొండ సరసన బాలీవుడ్ బ్యూటీ అనన్య పాండే హీరోయిన్ గా నటిస్తోంది. రమ్యకృష్ణ కీలక పాత్ర పోషిస్తోంది.

విష్ణు శర్మ ఈ చిత్రానికి సినిమాటోగ్రఫీ అందిస్తుండగా.. జునైద్ సిద్దిఖీ ఎడిటింగ్ వర్క్ చేస్తున్నారు. తెలుగు హిందీ భాషల్లో ఏకకాలంలో రూపొందిస్తున్న ఈ చిత్రాన్ని తమిళ మలయాళ కన్నడ భాషల్లో విడుదల చేయనున్నారు. ఇది పూరీ జగన్నాథ్ - విజయ్ దేవరకొండ లకు ఫస్ట్ పాన్ ఇండియా మూవీ. త్వరలోనే ఈ చిత్రాన్ని థియేట్రికల్ రిలీజ్ చేయనున్నట్లు మేకర్స్ వెల్లడించారు.