కోవిడ్ కారణంగా విడుదల వాయిదా పడ్డ సినిమాల లిస్ట్..!

దేశవ్యాప్తంగా కరోనా సెకండ్ వేవ్ విజృంభిస్తున్న కారణంగా టాలీవుడ్ లో విడుదల తేదీలను ప్రకటించిన సినిమాలన్నీ వెనక్కి వెళ్తున్నాయి. దేశవ్యాప్తంగా కోవిడ్ కేసులు పెరుగుతుండటం.. రాష్ట్రాల్లో లాక్ డౌన్ పెడుతుండటం.. థియేటర్స్ క్లోజ్ అవుతుండటంతో ఒక్కరొక్కరుగా సినిమాలను రిలీజ్ లను పోస్ట్ పోన్ చేస్తున్నట్లు అనౌన్స్ చేస్తూ వస్తున్నారు. ఇప్పటికే కొన్ని సినిమాలు వాయిదా వేస్తున్నట్లు అధికారికంగా ప్రకటించారు. అలా వాయిదా పడిన తెలుగు సినిమాల జాబితా చూద్దాం!

లవ్ స్టోరీ: యువ సామ్రాట్ అక్కినేని నాగచైతన్య - నేచురల్ బ్యూటీ సాయి పల్లవి జంటగా నటిస్తున్న తాజా చిత్రం ''లవ్ స్టోరీ''. శేఖర్ కమ్ముల దర్శకత్వం వహించిన ఈ అందమైన ప్రేమకథను సమ్మర్ కానుకగా ఏప్రిల్ 16న తెలుగు కన్నడ మలయాళ భాషల్లో రిలీజ్ చేయాలనుకున్నారు. కానీ కోవిడ్ పరిస్థితుల నేపథ్యంలో వాయిదా వేశారు.

టక్ జగదీష్: నేచురల్ స్టార్ నాని - రీతూ వర్మ - ఐశ్వర్య రాజేష్ హీరోహీరోయిన్లుగా నటిస్తున్న సినిమా ''టక్‌ జగదీష్‌''. దర్శకుడు శివ నిర్వాణ తెరకెక్కిస్తోన్న ఈ చిత్రాన్ని ఏప్రిల్ 23న విడుదల చేయనున్నట్లు ప్రకటించారు. అయితే రోజురోజుకూ కరోనా కేసులు పెరుగుతుండటంతో వాయిదా వేసుకున్నారు.

విరాటపర్వం: రానా దగ్గుబాటి - సాయి పల్లవి జంటగా దర్శకుడు వేణు ఉడుగుల తెరకెక్కిస్తున్న సినిమా ''విరాట పర్వం''. 1990స్ నాటి నక్సలిజం బ్యాక్ డ్రాప్ లో రూపొందుతున్న ఈ చిత్రాన్ని ఏప్రిల్ 30న రిలీజ్ చేయడానికి సన్నాహాలు చేసుకున్నారు. చివరకు కోవిడ్ ఎఫెక్ట్ పడటంతో వెనక్కి తగ్గారు.

ఆచార్య: మెగాస్టార్ చిరంజీవి - మెగా పవర్ స్టార్ రామ్ చరణ్ కలిసి నటిస్తున్న సినిమా ''ఆచార్య‌''. దీనికి కొరటాల శివ దర్శకత్వం వహిస్తున్నారు. ఇప్పటికే మెజారిటీ భాగం షూటింగ్ జరుపుకున్న ఈ చిత్రాన్ని మే 13న విడుద‌ల చేయాలనుకున్నారు. కానీ ప్రస్తుతం నెలకొన్న పరిస్థితుల నేపథ్యంలో 'ఆచార్య' సినిమాని రిలీజ్ చేయడం లేదని ప్రకటించారు.

నారప్ప: విక్టరీ వెంకటేష్ - దర్శకుడు శ్రీకాంత్ అడ్డాల కాంబినేషన్ లో తెరకెక్కుతున్న లేటెస్ట్ యాక్షన్ థ్రిల్లర్ ''నారప్ప''. ఇది తమిళ 'అసురన్' చిత్రానికి తెలుగు రీమేక్. ముందుగా మే 14న విడుదల చేయనున్నట్లు అనౌన్స్ చేసినా.. ఇప్పుడున్న పరిస్థితుల కారణంగా వాయిదా వేస్తున్నట్లు వెల్లడించారు.

ఖిలాడి: మాస్ మ‌హారాజా ర‌వితేజ - 'రాక్షసుడు' ఫేమ్ ర‌మేష్ వ‌ర్మ కాంబోలో వస్తున్న హై ఓల్టేజ్ యాక్ష‌న్ ఎంట‌ర్‌టైన‌ర్ ''ఖిలాడి''. ఇందులో మీనాక్షి చౌధ‌రి - డింపుల్ హ‌య‌తి హీరోయిన్లు. ప్ర‌పంచ‌వ్యాప్తంగా మే 28న విడుద‌ల చేయాలని భావించినా, పరిస్థితులు అనుకూలించేలా లేకపోవడంతో పోస్ట్ పోన్ చేశారు.

సీటీమార్: టాలీవుడ్ యాక్షన్ హీరో గోపీచంద్ - మిల్కీ బ్యూటీ తమన్నా భాటియా కలిసి నటిస్తున్న స్పోర్ట్స్‌ డ్రామా ''సీటీమార్‌''. కబడ్డీ నేపథ్యంలో తెరకెక్కుతున్న ఈ చిత్రానికి సంపత్‌ నంది దర్శకుడు. ఏప్రిల్ 2న ఈ చిత్రాన్ని ప్రేక్షకుల ముందుకు తీసుకురావాలని అనుకున్నారు. కానీ కరోనా టైంలో రిస్క్ ఎందుకని అందరికంటే ముందే వాయిదా వేసుకున్నారు.

పాగల్: 'మాస్ కా దాస్' విశ్వక్ సేన్ హీరోగా నివేదా పేతురాజ్ - సిమ్రాన్ చౌదరి - మేఘ లేఖ హీరోయిన్లుగా నటిస్తున్న సినిమా "పాగల్". న‌రేష్ కొప్పల్లి దర్శకత్వం వహిస్తున్న ఈ చిత్రాన్ని ముందుకు ఏప్రిల్ చివరి వారంలో రిలీజ్ చేయాలనుకున్నారు. ఆ తర్వాత మే 1వ తేదీకి వాయిదా వేశారు. ఈ క్రమంలో కోవిడ్ సెకండ్ వేవ్ కారణంగా ఇప్పుడు మరోసారి పోస్ట్ పోన్ చేశారు..

ఏక్ మినీ కథ: సంతోష్ శోభన్ - కావ్యా థాపర్ హీరోహీరోయిన్లుగా నటించిన చిత్రం 'ఏక్ మినీ కథ'. దర్శకుడు మేర్లపాక గాంధీ కథ అందించిన ఈ చిత్రానికి కార్తీక్ రాపోలు దర్శకత్వం వహించాడు. ఏప్రిల్ 30న ఈ సినిమాని రిలీజ్ చేయాలని భావించినా కరోనా పరిస్థితుల్లో వాయిదా వేయాల్సి వచ్చింది. ఇప్పుడు ఈ చిత్రాన్ని డైరెక్ట్ ఓటీటీ పద్ధతిలో రిలీజ్ చేసే ఆలోచన చేస్తున్నారని టాక్ నడుస్తోంది.

ఇష్క్-నాట్ ఏ లవ్ స్టోరీ: యువ హీరో తేజా సజ్జా - ప్రియా ప్రకాష్‌ వారియర్ జంటగా నటిస్తున్న తాజా చిత్రం ''ఇష్క్''. ఎస్‌.ఎస్‌. రాజు తెరకెక్కించిన ఈ సినిమాని ఏప్రిల్‌ 23న విడుదల చేయడానికి సన్నాహాలు చేసుకున్నారు. అయితే దేశవ్యాప్తంగా కోవిడ్-19 కేసులు పెరుగుతుండటంతో ప్రేక్షకుల ఆరోగ్యాన్ని దృష్టిలో ఉంచుకుని వాయిదా వేసుకున్నారు.