లోకేశ్ తో బన్నీ..? ఇది నిజంగా ఫ్యాన్స్ కు పిచ్చెక్కించే న్యూసే..!

టాలీవుడ్ స్టైలిష్ స్టార్ అల్లు అర్జున్ ఇప్పుడు ఐకాన్ స్టార్ గా మారిపోయాడు. 'పుష్ప: ది రైజ్' సినిమాతో నేషనల్ వైడ్ పాపులారిటీ తెచ్చుకొని.. సరికొత్త పాన్ ఇండియా స్టార్ గా అవతరించాడు. సుకుమార్ దర్శకత్వంలో తెరకెక్కిన 'పుష్ప' సినిమా గతేడాది క్రిస్మస్ కానుకగా విడుదలై బాక్సాఫీస్‌ వద్ద బ్లాక్ బస్టర్ గా నిలిచింది. ఇప్పుడు 'పుష్ప 2' కోసం సుక్కూ భారీ కసరత్తు చేస్తున్నాడు. అయితే బన్నీ తదుపరి సినిమా ఏంటనే ఆసక్తి అందరిలోనూ నెలకొంది.

'పుష్ప: ది రూల్' తర్వాత బన్నీ ఏ దర్శకుడితో కలిసి వర్క్ చేయబోతున్నారని ఇండస్ట్రీలోని ప్రతి ఒక్కరూ ఎదురుచూస్తున్నారు. ఈ నేపథ్యంలో ప్రస్తుతం టాక్ ఆఫ్ ది టౌన్ గా మారిన కోలీవుడ్ యంగ్ డైరెక్టర్ లోకేశ్ కనకరాజ్ పేరు తెర మీదకు వచ్చింది. లోకేష్ తో అల్లు అర్జున్ ఓ సినిమా చేయడానికి ప్లాన్స్ జరుగుతున్నాయని ఓ క్రేజీ రూమర్ ఇప్పుడు సోషల్ మీడియాలో చక్కర్లు కొడుతోంది.

నిజానికి 'పుష్ప' సినిమా రిలీజ్ అవ్వకముందు అల్లు అర్జున్ లైనప్ లో అనేక మంది దర్శకుల పేర్లు వినిపించాయి. వేణు శ్రీరామ్ తో 'ఐకాన్: కనబడుటలేదు' సినిమాని కంప్లీట్ చేస్తారని.. బోయపాటి శ్రీను దర్శకత్వంలో ఓ మూవీ చేస్తారని టాక్ వచ్చింది. ఈ జాబితాలో మురగదాస్ - లింగుస్వామి వంటి తమిళ దర్శకులు కూడా ఉన్నారు. ఇక కొరటాల శివ దర్శకత్వంలో అనౌన్స్ చేసిన చిత్రాన్ని ప్రస్తుతానికి హోల్డ్ లో పెట్టారు.

అయితే 'పుష్ప 2' తర్వాత అన్నీ మారిపోయాయి. మధ్యలో వేరే మూవీ చేయాలనుకున్న బన్నీ.. ఒక్కసారిగా వచ్చినపడిన క్రేజ్ తో ముందుగా సుకుమార్ తో రెండో భాగాన్ని పట్టాలెక్కించాలని ఫిక్స్ అయ్యాడు. దీంతో మిగతా దర్శకుల పేర్లు మళ్లీ వినబడలేదు. అయితే ఇప్పుడు లేటెస్టుగా లోకేశ్ కనగరాజ్ పేరు ఎక్కువగా వినిపిస్తోంది.

'మా నగరం' వంటి విభిన్నమైన చిత్రంతో డైరెక్టర్ గా ఇండస్ట్రీకి పరిచయమైన లోకేష్.. 'ఖైదీ' చిత్రంతో బ్లాక్ బస్టర్ అందుకున్నారు. ఈ క్రమంలో వచ్చిన 'మాస్టర్' సినిమా కూడా సక్సెస్ అవ్వడంతో టాప్ లీగ్ లో చేరిపోయాడు. ఇటీవల విడుదలైన 'విక్రమ్' చిత్రంతో మోస్ట్ వాంటెడ్ డైరెక్టర్ గా మారిపోయాడు.

'విక్రమ్' సినిమాలో 'ఖైదీ' పాత్రలను జోడించి మల్టీసవర్స్ వరల్డ్ ని క్రియేట్ చేసి.. ప్రేక్షకులకు సరికొత్త అనుభూతిని అందించారు లోకేష్. ఇప్పుడు ప్రతీ హీరో కూడా లోకేశ్ మల్టీవర్స్ లో భాగం అవ్వాలని కోరుకుంటున్నారు. ఈ నేపథ్యంలోనే బన్నీ - లోకేశ్ కాంబో సెట్ కానుందనే వార్తలు వినిపిస్తున్నాయి. ఇదే కనుక జరిగితే ఫ్యాన్స్ కు పూనకాలే అని చెప్పాలి.

యాక్షన్ చిత్రాల్లో హీరో క్యారక్టరైజేషన్స్ ను తనదైన శైలిలో ఆవిష్కరించడంలో లోకేశ్ దిట్ట. మరోవైపు 'పుష్ప' సినిమాలో రా అండ్ రస్టిక్ పాత్రలో అల్లు అర్జున్ అబ్బురపరిచాడు. ఒకవేళ వీరిద్దరి కలయికలో మూవీ వస్తే మాత్రం నెక్స్ట్ లెవల్ లో ఉంటుందనడంలో సందేహం లేదు.

లోకేష్ కనగరాజ్ 'విక్రమ్' తర్వాత విజయ్ తో సినిమా చేయనున్నట్లు ఇప్పటికే స్పష్టత వచ్చేసింది. ఇక 'విక్రమ్' లీడ్స్ ని బట్టి 'ఖైదీ 2' చిత్రంతో పాటుగా 'విక్రమ్ 3' ఉంటుందేమో అనే సందేహాలు ఉన్నాయి. ఇప్పుడు లోకేష్ మల్టీవర్స్ లోకి అల్లు అర్జున్ కూడా వచ్చి చేరితే ఎలా ఉంటుందో అనే ఊహే అభిమానులను ఎంతో ఎగ్జైట్ చేస్తోంది. మరి త్వరలోనే ఈ క్రేజీ కాంబో పై క్లారిటీ వస్తుందేమో చూడాలి.