బ్లాక్ బస్టర్ కాంబోలో మరో మూవీ లేనట్లే..!

సూపర్ స్టార్ మహేష్ బాబు - డైరెక్టర్ అనిల్ రావిపూడి కాంబోలో రూపొందిన 'సరిలేరు నీకెవ్వరు' చిత్రం బ్లాక్ బస్టర్ గా నిలిచింది. మహేష్ కెరీర్లో ఇప్పటివరకు అత్యధిక వసూళ్ళు రాబట్టిన సినిమా ఇదే. అందుకే అనిల్ తో మరో సినిమా చేయడానికి మహేష్ రెడీ అయ్యారు. ఈ నేపథ్యంలో ఇప్పటికే ఓ స్క్రిప్ట్ సిద్ధం చేసిన దర్శకుడు.. మహేష్ కు చెప్పడం కూడా జరిగిపోయింది. ఇటీవల అనిల్ ఓ ఇంటర్వ్యూలో మహేష్ తో ఇంకో సినిమా ఉండొచ్చని.. కలిసి మాట్లాడాలని చెప్పారు. ఈ నేపథ్యంలో 'సర్కారు వారి పాట' తర్వాతి సినిమా అనిల్ తోనే అని వార్తలు వచ్చాయి. అయితే ఉన్నట్టుండి త్రివిక్రమ్ శ్రీనివాస్ తో '#SSMB28' ప్రాజెక్ట్ కి అనౌన్స్ మెంట్ వచ్చింది.

దీంతో ఇప్పుడు మహేష్ - అనిల్ కాంబినేషన్లో మరో సినిమా ఉంటుందా లేదా అనేది చర్చనీయాంశం అయింది. నిజానికి అనిల్ చెప్పిన స్క్రిప్ట్ సెకండాఫ్ లో కొన్ని చేంజెస్ చేయమని మహేష్ సూచించారట. మార్పులు చేసిన మహేష్ కి వినిపించే లోపే త్రివిక్రమ్ శ్రీనివాస్ లైన్ లోకి రావడంతో ఆ ప్రాజెక్ట్ ని ప్రకటించేశారు. దీని తర్వాత రాజమౌళి దర్శకత్వంలో మహేష్ ఓ సినిమా చేయాల్సి ఉంది. ఈ నేపథ్యంలో ఇప్పట్లో మహేష్ తో చేసే అవకాశం లేకపోవడంతో వేరే హీరోతో సినిమా చేయాలని డిసైడైన అనిల్ రావిపూడి.. ఇప్పుడు నందమూరి బాలకృష్ణ తో చర్చలు జరుపుతున్నారని టాక్. దీనిని బట్టి చూస్తే బ్లాక్ బస్టర్ కాంబోలో ఇప్పట్లో మరో సినిమా లేదని అర్థం అవుతోంది. మరి రాజమౌళి సినిమా తర్వాత ఏమైనా మహేష్ - అనిల్ కలయికలో మూవీ ఉంటుందేమో చూడాలి.