వీడియో: 'క్యాబ్ స్టోరీస్' నుంచి 'లవ్ రింగ్ టోన్' సాంగ్..!

'స్పార్క్' ఓటీటీ వేదికగా ప్రేక్షకులను అలరించేందుకు 'క్యాబ్ స్టోరీస్' అనే మరో అవుట్ అండ్ అవుట్ ఎంటర్‌టైనర్‌ రెడీ అయింది. ఇందులో బిగ్‌ బాస్‌ ఫేమ్‌ దివి ప్రధాన పాత్రలో నటించగా.. గిరిధర్‌ - ప్రవీణ్‌ - శ్రీహాన్‌ - ధన్‌ రాజ్ - నందిని - సిరి‌ తదితరులు ఇతర కీలక పాత్రలు పోషించారు. కె.వి.ఎన్‌ రాజేశ్‌ ఈ చిత్రానికి దర్శకత్వం వహించారు. ఈ చిత్రం తొలి భాగం మే 28న ‘స్పార్క్‌’ ఓటీటీలో ఆడియన్స్ ముందుకు రానుంది. ఈ నేపథ్యంలో ఇప్పటికే విడుదలైన టీజర్ ఆసక్తిని కలిగించి. ఈ క్రమంలో తాజాగా 'లవ్ రింగ్ టోన్' అనే వీడియో సాంగ్ ని రిలీజ్ చేశారు.

'నీ నవ్వుల్లో.. ఏముందో.. అమ్మాయో.. కన్నుల్లో.. ఏం దాచావే..' అంటూ సాగిన ఈ లవ్ రింగ్ టోన్ సాంగ్ కు సాయి కార్తీక్‌ ట్యూన్ సమకూర్చారు. దీనికి బీజీ షిరిడి సాహిత్యం అందించగా.. సాయి కార్తీక్ ఆలపించారు. ప్రేమలో మునిగి తేలుతున్న దివి - శ్రీహాన్‌ ల మధ్య ఈ పాట చిత్రీకరించబడింది. సుజాత సిద్ధార్థ్ ఈ చిత్రానికి సినిమాటోగ్రఫీ అందించారు. తమ్మిరాజు ఎడిటింగ్ బాధ్యతలు నిర్వర్తించారు. ఎప్పుడో ముగిసిపోయిన కొంతమంది జీవిత ప్రయాణాన్ని ‘క్యాబ్‌ స్టోరీస్‌’ లో ఆసక్తికరంగా చెప్పబోతున్నట్లు తెలుస్తోంది. ఇమేజ్‌ స్పార్క్‌ ఎంటర్‌టైన్‌మెంట్‌ పతాకంపై ఎస్‌.కృష్ణ ఈ చిత్రాన్ని నిర్మించారు.