తెలుగు కన్నడ మలయాళ భాషల్లో 'లవ్ స్టోరీ'..!

యువ సామ్రాట్ అక్కినేని నాగచైతన్య నటిస్తున్న తాజా చిత్రం ''లవ్ స్టోరీ''. నేచురల్ బ్యూటీ సాయి పల్లవి హీరోయిన్ గా నటించిన ఈ చిత్రానికి శేఖర్ కమ్ముల దర్శకత్వం వహిస్తున్నారు. ఈ అందమైన ప్రేమకథను సమ్మర్ కానుకగా ఏప్రిల్ 16న ప్రేక్షకుల ముందుకు తీసుకురానున్నారు. అయితే 'లవ్ స్టోరీ' సినిమాని తెలుగుతో పాటుగా కన్నడ మలయాళ భాషల్లో కూడా సైమల్టేనియస్ గా రిలీజ్ చేస్తున్నట్టు మేకర్స్ తాజాగా ప్రకటించారు.

కాగా, 'ఫిదా' వంటి హిట్ సినిమా తర్వాత శేఖర్ కమ్ముల - సాయి పల్లవి కాంబోలో వస్తున్న సినిమా కావడం.. 'మజిలీ' 'వెంకీమామ' వంటి హిట్ సినిమా తర్వాత చైతన్య నటిస్తున్న చిత్రం కావడంతో 'లవ్ స్టోరీ' పై మంచి అంచనాలు ఏర్పడ్డాయి. దీనికి తగ్గట్టే ప్రీ రిలీజ్ బిజినెస్ కూడా బాగా జరిగినట్లు తెలుస్తోంది. ఇప్పటికే విడుదల చేసిన పోస్టర్స్- టీజర్ - సాంగ్స్ మంచి స్పందన తెచ్చుకున్నాయి. 'ఏయ్ పిల్లా' 'నీ చిత్రం చూసి' 'సారంగ దరియా' 'ఏవో ఏవో కలలే' అనే పాటలు యూట్యూబ్ ని షేక్ చేస్తున్నాయి.

'లవ్ స్టోరీ' చిత్రాన్ని వెంకటేశ్వర సినిమాస్ ఎల్ఎల్పీ మరియు అమిగోస్ క్రియేషన్స్ సంస్థలు సంయుక్తంగా నిర్మించాయి. కె నారాయణదాస్ నారంగ్ - పి. రామ్మోహన్ రావు నిర్మాతలుగా వ్యవహరించారు. ఇందులో రాజీవ్ కనకాల - ఈశ్వరీ రావు - దేవయాని తదితరులు ఇతర కీలక పాత్రల్లో నటించారు. తెలుగు తమిళ మలయాళ భాషల్లో విడుదల అవుతున్న ఈ సినిమా ఎలాంటి విజయాన్ని అందుకుంటుందో చూడాలి.