మహేష్ మేనల్లుడి స్థానంలో రాజ్ తరుణ్!

ఒక సినిమా కథ ఏ హీరో కోసం తయారవుతుందో.. మరే హీరో కోసం మెరుగులు దిద్దుకుంటుందో.. ఎవరు హీరోగా పట్టాలెక్కుతుందో.. ఫైనల్ గా ఎవరు హీరోగా ప్రేక్షకుల ముందుకు వస్తుందో ఎవరికీ తెలియదు. దీనికి ఉదాహరణగా ఎన్నో సినిమాల పేర్లను మనం చెప్పుకోవచ్చు. తాజాగా ఈ లిస్టులో మరో సినిమా చేరిందని ఫిలిం నగర్ టాక్.

మహేష్ బాబు మేనల్లుడు.. గల్లా జయదేవ్ కుమారుడు గల్లా అశోక్ ను హీరోగా లాంచ్ చేస్తూ స్టార్ ప్రొడ్యూసర్ దిల్ రాజు కొద్దిరోజుల క్రితం ఒక సినిమాను లాంచ్ చేసిన విషయం తెలిసిందే. ఈ సినిమాకు దర్శకుడు 'ఆడు మగాడ్రా బుజ్జి' ఫేం కృష్ణారెడ్డి. కారణాలు తెలియదు గానీ ఆ సినిమా ఆగిపోయింది. ఇదిలా ఉంటే దిల్ రాజు తాజాగా రాజ్ తరుణ్ హీరోగా ఒక సినిమాను నిర్మించేందుకు రంగం సిద్ధం చేసుకుంటున్నారట. ఈ సినిమాకు దర్శకుడు ఎవరో కాదు.. గల్లా అశోక్ సినిమాకు దర్శకత్వం వహించాల్సిన కృష్ణారెడ్డి అని సమాచారం. ఇన్సైడ్ టాక్ ఏంటంటే అక్కడ ఆగిన మహేష్ మేనల్లుడి సినిమానే రాజ్ తరుణ్ కు సెట్ చేశారట దిల్ రాజు.

అంటే అటుదిటు మార్చి అబ్రకదబ్ర అని మ్యాజిక్ చేస్తున్నారన్నమాట. రాజ్ తరుణ్ కు ఈమధ్య సరైన హిట్ లేక కెరీర్ లో స్లో అయ్యాడు. ముఖ్యంగా దిల్ రాజు బ్యానర్ లో తెరకెక్కిన 'లవర్' సినిమా పరాజయం తర్వాత లాంగ్ బ్రేక్ కూడా తీసుకున్నాడు. మరి ఈ సినిమాతో విజయం సాధిస్తాడేమో వేచి చూడాలి.