ఔను.. కమల్ కలల సినిమా కదులుతోంది

మరుదనాయగం.. కమల్ హాసన్ కలల సినిమా అని కొత్తగా చెప్పాల్సిన పని లేదు. రెండు దశాబ్దాల కింద బ్రిటిష్ రాణి క్వీన్ ఎలిజబెత్ సమక్షంలో అంగరంగ వైభవంగా మొదలై ఆ తర్వాత మధ్యలో ఆగిపోయిన సినిమా. కమల్ షూట్ చేసిన ఆ కొన్ని దృశ్యాలు చూసినపుడల్లా ఆయన అభిమానులకు మనస్సు చివుక్కుమంటుంది. భారతీయ ప్రేక్షకులు ఓ గొప్ప సినిమాను మిస్సయిపోయారేమో అన్న ఫీలింగ్ కలుగుతుంది. ఆర్థిక కారణాలతో అర్ధంతరంగా ఆగిపోయిన ఈ సినిమాను మళ్లీ మొదలుపెట్టి పూర్తి చేయడానికి కమల్ హాసన్ చాలా ప్రయత్నాలే చేశాడు కానీ.. అవేవీ ఫలించలేదు.

ఐతే ఎట్టకేలకు ‘మరుదనాయగం’ మళ్లీ సెట్స్ మీదికి వెళ్లబోతోంది. ప్రస్తుతం శంకర్-రజినీకాంత్ కాంబినేషన్లో రోబో-2 సినిమాను నిర్మిస్తున్న లైకా ప్రొడక్షన్సే ఈ చిత్రాన్ని టేకప్ చేయబోతున్నట్లు కొన్ని రోజుల కిందట వార్తలొచ్చిన సంగతి తెలిసిందే. ఇప్పుడీ విషయంలో అధికారిక ప్రకటన కూడా వచ్చేసింది. లైకా ప్రొడక్షన్స్ అధినేతల్లో ఒకరైన రాజు మహాలింగం తన ట్విట్టర్ పేజీలో ఈ మేరకు ఓ ప్రకటన చేశారు. మరుదనాయగం సినిమాను తమ సంస్థ టేకప్ చేస్తోందని.. త్వరలోనే ఈ సినిమా సెట్స్ మీదికి వెళ్తుందని ఆయన వెల్లడించారు. కమల్ తో కలిసి ఉన్న ఫొటోను కూడా ఆయన పోస్ట్ చేశారు. కాబట్టి ఈ ఏడాదే కమల్ కలల సినిమా పున:ప్రారంభం కాబోతోందన్నమాట.