SVP లో మహేష్ క్యారక్టర్ ని రివీల్ చేసిన లిరిసిస్ట్..!

సూపర్ స్టార్ మహేష్ బాబు నటిస్తున్న లేటెస్ట్ మూవీ ''సర్కారు వారి పాట''. పరశురామ్ పెట్లా దర్శకత్వంలో తెరకెక్కుతున్న ఈ యాక్షన్ ఎంటర్టైనర్ లో మహేష్ వింటేజ్ లుక్ లో కనిపించనున్నారు. ఫ్రీ హెయిర్ స్టైల్ - మెడ మీద రూపాయి కాయిన్ టాటూతో ఆకట్టుకున్నారు.

'పోకిరి' తరహా వైబ్స్ ఉన్నాయని ఫ్యాన్స్ సర్కిల్స్ నుంచి కామెంట్స్ వస్తున్నాయి. అయినప్పటికీ ఇందులో అతని పాత్ర తీరుతెన్నులు ఎలా ఉంటాయని ఆసక్తిగా ఎదురుచూస్తున్నారు. అయితే ఎప్పటికప్పుడు బయటకు వస్తున్న లీకులు వారిలో ఎగ్జైట్ మెంట్ ని పోగొడుతున్నాయి.

'సర్కారు వారి పాట' సినిమా నుంచి ఇటీవల 'కళావతి' అనే పాట విడుదలైంది. ప్రేక్షకుల నుంచి అద్భుతమైన స్పందన తెచ్చుకున్న ఈ సాంగ్.. 35 మిలియన్లకు పైగా వ్యూస్‌ తో సోషల్ మీడియాలో ట్రెండింగ్ లో ఉంది.

ఎస్ ఎస్ థమన్ స్వరపరిచిన ఈ పాటను సిద్ శ్రీరామ్ ఆలపించారు. లిరిసిస్ట్ అనంత శ్రీరామ్ సాహిత్యం అందిచారు. ఈ మెలొడీకి వచ్చిన రెస్పాన్స్ తో అనంత శ్రీరామ్ వరుసగా టీవీ ఛానెళ్లకు ఇంటర్వ్యూలు ఇస్తూ వస్తున్నారు. ఈ క్రమంలో సినిమాకు సంబంధించిన వివరాలు వెల్లడించడం ఫ్యాన్స్ ని ఇబ్బంది పెడుతోంది.

హీరో తాలుకూ పాత్ర తీరుతెన్నులను ఆసరాగా తీసుకొని 'కళావతి' పాట రాశానని చెప్పిన అనంత్ శ్రీరామ్.. సర్కారు వారి పాటలో మహేష్ బాబు క్యారక్టర్ మరియు కథ గురించి అవసరమైన దానికంటే ఎక్కువ ఉత్సాహంగా వెల్లడించారు.

ఒక మొండోడు.. ఎవరూ లేని అనాధగా పెరిగిన వ్యక్తి.. జీవితంలో అసలు అమ్మాయి వాసన తెలియని వాడు.. ఎప్పుడు చూసినా కొట్లాటల్లో ఉండేవాడు.. ఇలాంటి వాడికి ప్రేమ ఒక్కసారిగా వచ్చినప్పుడు ఎలా వ్యక్త పరుస్తాడు అని ఆలోచించి ఈ పాటను రాశాను అని గేయ రచయిత ఓ ఇంటర్వ్యూలో చెప్పుకొచ్చారు.

అనంత్ శ్రీరామ్ సాంగ్ గురించి వివరిస్తూ.. తెలియకుండానే 'సర్కారు వారి పాట' లో మహేష్ బాబు క్యారక్టర్ ను రివీల్ చేసారు. అతనొక అనాథ అని.. ఎప్పుడు చూసినా గొడవలకు వెళ్తుంటాడని పాత్ర స్వభావాన్ని బయట పెట్టేసారు. దీంతో ఇలాంటి వాటి వల్ల ఏం జరుగుతోందన్న సస్పెన్స్‌ బయట పడుతోందని సూపర్ స్టార్ ఫ్యాన్స్ కలవర పడుతున్నారు. అనాలోచిత లీకుల వల్ల ఉత్కంఠ పోతుందని అభిమానులే ఆందోళన చెందుతున్నారు.

ఇప్పటికే సినిమా మొదలైన దగ్గర నుంచి సినిమాకు సంబంధించిన ఏదొక కంటెంట్ లీక్ అవుతూనే ఉంది. ఈ విధంగానే ఫస్ట్ లుక్ రాకముందే సర్కారు వారి మహేష్ ఎలా ఉంటారో తెలిసి పోయింది. అలానే లొకేషన్స్ లో షూటింగ్ కు సంబంధించిన ఫోటోలు - వీడియోలు నెట్టింట వైరల్ అయ్యాయి. ఇటీవల 'కళావతి' సాంగ్ లీక్ కాబడి.. ఎగ్జైట్ మెంట్ లేకుండా చేసింది. ప్లాన్ చేసిన దాని కంటే ఒక రోజు ముందుగానే రిలీజ్ చేయాల్సిన పరిస్థితి క్రియేట్ చేసింది.

సర్కారు వారి పాట రిలీజ్ కు ఇంకా 80 రోజుల సమయం ఉంది. సినిమా నుంచి రావాల్సిన అప్డేట్స్ చాలా ఉన్నాయి. రాబోయే రోజుల్లో వచ్చే కంటెంట్ నుంచి మహేష్ బాబు పాత్ర గురించి.. సినిమా కథ గురించి తెలుసుకోవాలని ఎగ్జైటింగ్ గా ఉన్నారు. కానీ ఇలా సినిమాలోని ఏదొక విషయం రివీల్ అవుతుండటం వారిలో ఉత్సుకతను తగ్గిస్తోంది. అందుకే ఇకపై మేకర్స్ ఈ విషయంలో జాగ్రత్తగా ఉండాలని ఫ్యాన్స్ సూచిస్తున్నారు.

'సర్కారు వారి పాట' చిత్రంలో మహేష్ బాబు సరసన మహానటి కీర్తి సురేష్ హీరోయిన్ గా నటిస్తోంది. సముద్ర ఖని - ప్రకాష్ రాజ్ - వెన్నెల కిషోర్ - సుబ్బరాజు తదితరులు కీలక పాత్రలు పోషిస్తున్నారు. మైత్రీ మూవీ మేకర్స్ - GMB ఎంటర్‌టైన్‌మెంట్స్ మరియు 14 రీల్స్ ప్లస్ బ్యానర్స్‌ కలిసి ఈ చిత్రాన్ని నిర్మిస్తున్నాయి.

ఆర్. మది సినిమాటోగ్రఫీ అందిస్తుండగా.. ఏఎస్ ప్రకాష్ ఆర్ట్ డైరెక్టర్ గా.. మార్తాండ్ కె వెంకటేష్ ఎడిటింగ్ వర్క్ చేస్తున్నారు. ఇప్పటికే సర్కారు వారి పాట షూటింగ్ దాదాపు 80% పూర్తయింది. సమ్మర్ కానుకాగా ప్రపంచ వ్యాప్తంగా మే 12వ తేదీన ఈ సినిమాని ప్రేక్షకుల ముందుకు తీసుకురానున్నారు.