చిన్న‌నాటి క్రికెట్ భాగ‌స్వామిని హీరోని చేశాడు!

రౌడీ విజ‌య్ దేవ‌ర‌కొండ త‌న సోద‌రుడు ఆనంద్ దేవ‌ర‌కొండ‌ను హీరోగా ఒక్కో మెట్టు ఎక్కించేందుకు త‌న‌వంతు స‌హాయ‌స‌హ‌కారాలు అందిస్తున్న సంగతి తెలిసిందే. అందుకోసం సొంత బ్యాన‌ర్ ప్రారంభించి పెట్టుబ‌డులు పెడుతున్నారు. తొలి ప్ర‌య‌త్నంలో ఆనంద్ అంత‌గా మెప్పించ‌లేక‌పోయినా ఇటీవ‌ల వెబ్ సినిమాతో ఆక‌ట్టుకున్నాడ‌న్న టాక్ వినిపించింది.

ఇక ఆనంద్ తో విజ‌య్ దేవ‌ర‌కొండ అనుబంధం ఎలాంటిది? అంటే.. ఓసారి బాల్య‌స్మృతుల్లోకి వెళ్లారు దేవ‌ర‌కొండ‌. నేడు పుట్టినరోజు జ‌రుపుకుంటున్న త‌న‌ సోదరుడు ఆనంద్ దేవేరకొండకు శుభాకాంక్షలు తెలిపిన విజయ్ సోష‌ల్ మీడియాలో సోదరుడికి ఎమోషనల్ బర్త్ ‌డే నోట్ రాశారు. తన చిన్న‌నాటి క్రికెట్ భాగస్వామిని ప్రేమిస్తున్నానని అన్నారు. నా స్కూల్ జూనియర్.. నా చీర్ టీం.. క్రైసిస్ హ్యాండ్లర్.. ఇప్పుడు సహోద్యోగి,.. ఎప్పటికీ సోదరుడు ...ఆనంద్ కి పుట్టినరోజు శుభాకాంక్షలు. నేను చాలా సంతోషంగా ఉన్నాను. ప్రతిదానికీ నువ్వున్నావు! అంటూ ఎమోష‌న్ అయ్యారు.

బ‌ర్త్ డే సంద‌ర్భంగా ఆనంద్ న‌టిస్తున్న `పుష్పక విమానం` నుండి కొత్త పాటను కూడా విజ‌య్ విడుదల చేశారు. సిలకా పేరుతో ఈ చిత్రం నుండి మొదటి లిరికల్ సాంగ్ విడుదలైంది. ఈ చిత్రానికి దామోదర్ దర్శకత్వం వహిస్తున్నారు. విజయ్ దేవరకొండ కింగ్ ఆఫ్ ది హిల్ ప్రొడక్షన్స్ అండ్ టాంగా ప్రొడక్షన్స్ ఈ ప్రాజెక్టును నిర్మిస్తున్నాయి.

ఆనంద్ 2019 లో వచ్చిన దొరసాని చిత్రంతో తెరంగేట్రం చేశారు. అతని రెండవ చిత్రం మిడిల్ క్లాస్ మెలోడీస్ గత సంవత్సరం విడుదలై ప్రేక్షకుల హృదయాలను గెలుచుకుంది. ప్ర‌స్తుతం సెట్స్ పై ఉన్న సినిమాపైనా అంచ‌నాలున్నాయి.

పుష్ప‌క విమానం లో ఆనంద్ దేవ‌ర‌కొండ ఏజ్ బార్ రోల్ చేస్తున్నాడు. ఓ గ‌వ‌ర్న‌మెంట్ టీచ‌ర్ పాత్ర‌లో న‌టిస్తున్నార‌ని తెలిసింది. ఇక‌పోతే త‌న వ‌య‌సుకు మించి ప‌రిణ‌తి చూపించే ఆ పాత్ర‌తో మెప్పిస్తాడా లేదా? అన్న‌ది చూడాలి. ఆనంద్ దేవరకొండకు తుపాకి త‌ర‌పున ప్ర‌త్యేకించి పుట్టినరోజు శుభాకాంక్షలు.