మాస్ మెగా హీరోలతో.. రాబోయే హీరో!

టాలీవుడ్ లో చిన్న స్థాయి నుంచి కష్టపడి పైకి వచ్చిన స్టార్ హీరోల జాబితా చూసుకుంటే మెగాస్టార్ చిరంజీవి తర్వాత వెంటనే వినిపించే పేరు మాస్ మహారాజ్ రవితేజ. సినిమా పిచ్చితో ఇండస్ట్రీలోకి అడుగుపెట్టి అసిస్టెంట్ డైరెక్టర్ గా కెరియర్ స్టార్ట్ చేసి తరువాత హీరో ఫ్రెండ్ పాత్రలలో నటించి, చిన్న చిన్న పాత్రలు చేసుకుంటూ శ్రీనువైట్ల దర్శకత్వంలో మొదటిసారి సోలో హీరోగా నీ కోసం అనే సినిమాలో నటించాడు.

ఆ సినిమా ఓ మోస్తారుగా ఆడింది. అయితే టాలెంటెడ్ స్టార్ డైరెక్టర్ పూరి జగన్నాథ్ దర్శకత్వంలో ఇట్లు శ్రావణి సుబ్రహ్మణ్యం సినిమాతో ఒక్కసారిగా తనని తాను ప్రూవ్ చేసుకున్నాడు. ఆ తరువాత పూరి దర్శకత్వంలోనే ఇడియట్ సినిమాతో సూపర్ సక్సెస్ అందుకున్నాడు. ఇక రాజమౌళి దర్శకత్వంలో వచ్చిన విక్రమార్కుడు సినిమా మాస్ మహారాజ్ సినిమా కమర్షియల్ గా సూపర్ సక్సెస్ ఇవ్వడంతో పాటు స్టార్ హీరో ఇమేజ్ తీసుకొచ్చింది.

ఈ మూవీ తర్వాత వెనక్కి తిరిగి చూసుకునే అవకాశం లేకుండా సోలో హీరోగా దూసుకుపోతున్నాడు. ప్రస్తుతం టాలీవుడ్ లో ఉన్న స్టార్ హీరోలలో రవితేజ కూడా తనకంటూ ఒక చాప్టర్ ని క్రియేట్ చేసుకున్నారు. ఈ స్థాయి రావడం వెనుక రవితేజ కృషి ఎంత ఉందో ప్రత్యేకంగా చెప్పాల్సిన పని లేదు. ఇదిలా ఉంటే ధమాకా సినిమాతో సూపర్ సక్సెస్ అందుకొని ఏకంగా వంద కోట్ల క్లబ్ లో చేరిన రవితేజ తాజాగా వాల్తేర్ వీరయ్య సినిమాలో మెగాస్టార్ చిరంజీవితో కలిసి నటించి సూపర్ సక్సెస్ అందుకున్నాడు.

ఈ సినిమాలో చిరంజీవితో సమానమైన పాత్రని రవితేజ చేసి ప్రేక్షకుల నుంచి కూడా ప్రశంసలు సొంతం చేసుకున్నాడు. రవితేజ ఫ్యామిలీ నుంచి ఇప్పటికే అతని తమ్ముళ్ళు రఘు, భరత్ కూడా హీరోలుగా పరిచయం అయ్యారు. తరువాత క్యారెక్టర్ ఆర్టిస్ట్స్ గా సెటిల్ అయ్యారు. ఇప్పుడు రవితేజ తమ్ముడు రఘు కొడుకు మాధవ్ భూపతి రాజు హీరోగా ఏ పిల్లా అనే సినిమాతో పరిచయం అవుతున్నాడు. ఈ కుర్ర హీరో వాల్తేర్ వీరయ్య సినిమాపై పోస్ట్ చేయడంతో పాటు సినిమా షూటింగ్ టైంలో మెగాస్టార్ చిరంజీవి బ్లెస్సింగ్ తీసుకొని రవితేజతో, చిరంజీవితో కలిసి దిగిన ఫోటోని ట్విట్టర్ లో షేర్ చేశాడు.

రవితేజ ఫ్యామిలీ నుంచి వస్తున్న మాధవ్ లాంచింగ్ గట్టిగానే జరుగుతుంది. భవ్య క్రియేషన్స్ సమర్పణలో ఈ మూవీ తెరకెక్కుతుంది. రవితేజతో ఖిలాడీ సినిమా చేసిన రమేష్ వర్మ ఈ మూవీకి కథ అందిస్తూ ఉండటం విశేషం. అలాగే మిక్కీ జె మియర్ సంగీతం అందిస్తున్నారు. వింటేజ్ లవ్ స్టొరీగా ఈ మూవీ తెరకెక్కుతుంది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.