మాధవన్ సెట్లో మందుకొట్టి ఏం చేశాడు?

మాధవన్ ఏంటి.. సెట్లో మందు కొట్టడం ఏంటి అంటారా? ఐతే ‘సాలా ఖడూస్’ టీమ్ రీసెంట్ గా రిలీజ్ చేసిన వీడియో చూడండి. మందుకొట్టి మాధవన్ సెట్లో ఎంత గొడవ చేశాడో అర్థమవుతుంది. ఐతే షూటింగుకి మందుకొట్టి వచ్చే అతనేమీ రభస చేయలేదు. సినిమాలో మందుకొట్టే సన్నివేశం సహజంగా, ఎఫెక్టివ్ గా రావడం కోసం కెమెరా ముందు నిజంగానే మందుకొట్టాడు మాధవన్. వోడ్కాలోకి జ్యూస్ కలుపుకుని దాన్ని గటగటా తాగేశాడు. ఆ సీన్లో పక్కనే నాజర్ కూడా ఉన్నాడు. ఇది చెన్నై బీచ్ ఒడ్డున ఉన్న ఓ లోకల్ బార్లో సాగే సన్నివేశం. బార్ వాతావరణాన్ని సహజంగా తీర్చిదిద్దాక.. సన్నివేశం మరింత సహజంగా ఉండటం కోసం మందు కొట్టాడు మాధవన్.

ఐతే మందేశాక మాధవన్ శ్రుతి తప్పాడు. మత్తు బాగా తలకెక్కేసి పిచ్చి పిచ్చిగా ప్రవర్తించాడు. ముందు కెమెరా ఉన్న సంగతి మరిచిపోయాడు. నటన సంగతి పక్కన పెట్టేసి అలాగే టేబుల్ మీదికి ముఖం వాల్చేసి తూగాడు. అంతే కాదు.. సెట్లో ఉన్న వాళ్లపై కేకలు వేశాడు. లేచి అటూ ఇటూ తిరుగుతూ నానా రభస చేశాడు. మాధవన్ ప్రవర్తనతో షాకైపోతూనే ఎంజాయ్ చేశారు యూనిట్ సభ్యులంతా. ‘సాలా ఖడూస్’ యూనిట్ కు ఓ మంచి జ్నాపకంగా మిగిలిపోయిన ఈ వీడియోను ఇప్పుడు బయటపెట్టారు. ఈ అనుభవానికి సంబంధించి మాధవన్ తన అభిప్రాయాల్ని కూడా పంచుకున్నాడు. ఇప్పుడీ వీడియో సోషల్ మీడియాలో వైరల్ అవుతోంది.