మన హీరోల నిజ స్వరూపం తెలియాలంటే..!

తెలుగులో పలు చిత్రాల్లో హీరోయిన్‌ గా నటించిన ముద్దుగుమ్మ మాధవిలత ప్రస్తుతం బిజీపీలో క్రియాశీలక కార్యకర్తగా వ్యవహరిస్తున్న విషయం తెల్సిందే. పార్టీ కార్యక్రమాలతో పాటు అప్పుడప్పుడు టీవీ కార్యక్రమాల్లో - ఇంటర్వ్యూల్లో సందడి చేస్తూ మాధవిలత ఉంటుంది. ఆమద్య కాస్టింగ్‌ కౌచ్‌ పై తీవ్ర స్థాయిలో వ్యాఖ్యలు చేసి - ఇండస్ట్రీపై సంచలన వ్యాఖ్యలు చేసిన ఈమె తాజాగా బిగ్‌ బాస్‌ టీంపై - తెలుగు హీరోలపై విమర్శలు గుప్పించింది. తాజాగా బిగ్‌ బాస్‌ షో గురించి ఒక టీవీ ఛానెల్‌ లో జరిగిన చర్చ కార్యక్రమంలో మాధవిలత పాల్గొంది. ఆ సమయంలో ఆమె చేసిన వ్యాఖ్యలు సినీ వర్గాల వారికి ఆగ్రహంను కలిగిస్తున్నాయి.

మాధవిలత మాట్లాడుతూ.. బిగ్‌ బాస్‌ రియాల్టీ షోలో మన స్టార్‌ హీరోలను పెట్టాలి. అప్పుడు వారి అసలు రూపం వారి అభిమానుల ముందు ప్రదర్శింపబడుతుంది. బిగ్‌ బాస్‌ టాస్క్‌ల్లో ఆ హీరోలు తమను తాము మర్చిపోయి కొట్టుకోవడంతో పాటు - ఒకరిని ఒకరు తిట్టుకోవడం కూడా మనం చూడొచ్చు. వాళ్ల నిజ స్వరూపాలు చూసి అభిమానులు పారిపోవడం ఖాయం అని - బిగ్‌ బాస్‌ ఇంట్లో మన హీరోల నిజ స్వరూపం తేలిపోయే అవకాశం ఉందని ఆమె వ్యాఖ్యలు చేసింది. బిగ్‌ బాస్‌ కార్యక్రమ నిర్వాహకులు ప్రేక్షకుల ఓట్లకు విలువ ఇవ్వకుండా తమ ఇష్టానుసారంగా ఎలిమినేషన్‌ చేసేస్తున్నారు అంటూ మాధవిలత విమర్శలు చేసింది.

ప్రస్తుతం బిగ్‌బాస్‌ ఇంట్లో ఉన్న కౌశల్‌ అంటే తనకు ఇష్టం అని - అతడు కేవలం ఆట మాత్రమే ఆడతాను అని, ఇంట్లో ఏ ఒక్కరితో కూడా ఎమోషనల్‌ రిలేషన్‌ షిప్‌ ను పెట్టుకోను అంటూ మొదటి నుండి చెబుతూ వస్తున్నాడు. అలా రిలేషన్‌ షిప్‌ పెట్టుకోవడం వల్ల ఆట సరిగా సాగదు అనేది అతడి అభిప్రాయం. ఆ అభిప్రాయం నాకు బాగా నచ్చింది - కౌశల్‌ ను బిగ్‌ బాస్‌ లో ఉన్నంత వరకే తాను అభిమానిస్తాను అని కూడా చెప్పుకొచ్చింది. నూతన్‌ నాయుడు ఎలిమినేషన్‌ను షో నిర్వాహకులు మంచి నిర్ణయంగా వారికి వారే భావించారు. కాని అమిత్‌కు తక్కువ ఓట్లు వచ్చినా కూడా కొనసాగిస్తూ చాలా పెద్ద తప్పు చేస్తున్నారు అంటూ మాధవిలత పేర్కొంది. ఇక కౌశల్‌ ఆర్మీ మరియు నూతన్‌ నాయుడులు బిగ్‌ బాస్‌ ఓట్ల కోసం డబ్బు పంచుతున్నారు అంటూ వస్తున్న వార్తలను తాను నమ్మను అంటూ చెప్పుకొచ్చింది.