నా బయోపిక్‌ కు ఆమె సూపర్‌

ప్రస్తుతం బాలీవుడ్‌ లో బయోపిక్‌ ల వరవడి కొనసాగుతున్న విషయం తెల్సిందే. పలువురు రాజకీయ, క్రీడా, సినీ ప్రముఖుల బయోపిక్‌ లు ఇప్పటికే ప్రేక్షకుల ముందుకు వచ్చాయి, మరి కొన్ని కూడా ప్రేక్షకుల ముందుకు వచ్చేందుకు సిద్దం అవుతున్నాయి. ఈ సమయంలోనే బాలీవుడ్‌ సీనియర్‌ స్టార్‌ హీరోయిన్‌ మాధురి దీక్షిత్‌ బయోపిక్‌ కూడా తెరకెక్కించేందుకు ప్రయత్నాలు జరుగుతున్నాయంటూ సమాచారం అందుతోంది.

1980, 90లలో మాధురి దీక్షిత్‌ బాలీవుడ్‌ ప్రేక్షకులను తన అందంతో పాటు నటనతో ఉర్రూతలూగించింది. రెండు దశాబ్దాల పాటు ఆమె హవా కొనసాగింది. 1999లో డాక్టర్‌ శ్రీరామ్‌ ను వివాహం చేసుకున్న తర్వాత అమెరికా వెళ్లి సెటిల్‌ అయ్యింది. అక్కడ కొన్ని సంవత్సరాలు ఉంది. ప్రెగ్నెన్సీ పిల్లల వల్ల సినిమాలకు దూరంగా ఉన్న మాధురి దీక్షిత్‌ మళ్లీ రీ ఎంట్రీ ఇచ్చింది. రీ ఎంట్రీతో కూడా మాధురి దీక్షిత్‌ మంచి పాత్రల్లో నటించి, మెప్పించింది. తాజాగా ఈమె కలంక్‌ చిత్రంతో ప్రేక్షకుల ముందుకు వచ్చింది. ఆ సినిమా మంచి విజయాన్ని సొంతం చేసుకున్న నేపథ్యంలో మాధురి దీక్షిత్‌ కు మరిన్ని పెద్ద చిత్రాల్లో ఆఫర్లు వస్తున్నాయి. తాజాగా ఈమె ఒక ఇంటర్వ్యూలో మాట్లాడుతూ తన బయోపిక్‌ గురించి స్పందించింది.

మీ బయోపిక్‌ లో ప్రస్తుతం ఉన్న హీరోయిన్స్‌ లో ఎవరు అయితే బాగుంటుందని ప్రశ్నించిన సమయంలో ఆమె ఏమాత్రం ఆలోచించకుండా ఆలియా భట్‌ పేరు చెప్పింది. మాధురి దీక్షిత్‌ మాట్లాడుతూ... నా బయోపిక్‌ తీస్తే ఎలాంటి అనుమానం, సందేహం లేకుండా ఆలియా భట్‌ ను నా పాత్రకు ఎంపిక చేయడం కరెక్ట్‌ అంటాను. ఆమె అయితేనే నా పాత్రకు సూపర్‌ గా సూట్‌ అవుతుంది. అయితే ఆలియా నా పాత్ర ను చేసేందుకు కథక్‌ డాన్స్‌ ను నేర్చుకోవాల్సి ఉంటుంది. ఒక అద్బుతమైన నటి ఆలియా అనేది నా అభిప్రాయం. నా పాత్రను ఆమె చేస్తే నిజంగా చాలా బాగుంటుందని, సరదాగా ఉంటుందని నాకు అనిపిస్తుంది. బాలీవుడ్‌ లో ప్రస్తుతం టాప్‌ హీరోయిన్‌ గా కొనసాగుతున్న ఆలియా మరి మాధురి దీక్షిత్‌ బయోపిక్‌ కు ఓకే చెబుతుందా అనేది అనుమానమే.