మెగా సపోర్ట్ అంతా ఆ సినిమాకే

గత మూడేళ్లూ సంక్రాంతికి మెగా హీరోలదే సందడంతా. పోయినేడాది పవన్ కళ్యాణ్ సినిమా ‘గోపాల గోపాల’ రిలీజైతే.. అంతకు ముందు రెండేళ్లు రామ్ చరణ్ ఎవడు - నాయక్ సినిమాలతో సందడి చేశాడు. ఈ ఏడాది సంక్రాంతికి మాత్రం మెగా హీరో సినిమా ఒక్కటీ లేదు. మెగా ఫ్యామిలీలో ప్రస్తుతం తొమ్మిది మంది హీరోలున్నా ఒక్కరూ సంక్రాంతికి తమ సినిమాల్ని రెడీ చేయకపోవడం ఆశ్చర్యం కలిగించే విషయమే. ఈసారి పండగ సందడంతా నందమూరి హీరోలదే అని చెప్పాలి. ఐతే మెగా హీరోలు బరిలో లేకపోయినప్పటికీ.. సంక్రాంతికి వస్తున్న ఓ సినిమాకు తెర వెనుక అండగా నిలుస్తున్నారు. ఆ సినిమా మరేదో కాదు.. ‘ఎక్స్ ప్రెస్ రాజా’.

ఈ సినిమాకు మెగా అండ ఉండటానికి కారణాలు చాలానే ఉన్నాయి. హీరో శర్వానంద్ రామ్ చరణ్ కు క్లోజ్ ఫ్రెండ్. తన స్నేహితుడి సినిమాను ట్విట్టర్లో ప్రమోట్ చేశాడు కూడా చరణ్. ఇక ఈ చిత్ర నిర్మాతలకు మెగా ఫ్యామిలీతో క్లోజ్ బాండ్ ఉంది. అల్లు అరవింద్ తో కలిసి ‘భలే భలే మగాడివోయ్’ సినిమా నిర్మించడమే దీనికి కారణం. దీంతో అల్లు అరవింద్ సపోర్ట్ ‘ఎక్స్ ప్రెస్ రాజా’కు బాగా ఉంది. మెగా ఫ్యామిలీ పీఆర్ టీం కూడా సినిమాను బాగా ప్రమోట్ చేయడానికి తమ వంతు సహకారమందిస్తున్నారు. ఇంత పోటీలో కూడా ఈ చిన్న సినిమాకు 500 దాకా థియేటర్లు దొరికాయంటే అందులో పరోక్షంగా మెగా ఫ్యామిలీ హ్యాండ్ ఉంది. మెగా ఫ్యామిలీ డైరెక్టుగా ఓ సినిమాకు సపోర్ట్ ఇవ్వాల్సిన పని లేదు. వాళ్ల సపోర్ట్ ఉంది అన్న అభిప్రాయం కూడా ఓ సినిమాకు ఎంతో మేలు చేస్తుంది. ‘ఎక్స్ ప్రెస్ రాజా’కు మంచి హైప్ రావడానికి ఇది కూడా ఓ కారణమే.