నెట్ ఫ్లిక్స్ చేతికి 'మహాసముద్రం'..?

'Rx 100' ఫేమ్ అజయ్ భూపతి తెరకెక్కిస్తున్న ఇన్టెన్స్ లవ్ అండ్ యాక్షన్ డ్రామా ''మహాసముద్రం''. ఇందులో శర్వానంద్ - బొమ్మరిల్లు సిద్ధార్థ్ హీరోలుగా.. అదితి రావు హైదరి - అను ఇమ్మాన్యుయేల్ హీరోయిన్లుగా నటిస్తున్నారు. దసరా పండుగ సందర్భంగా అక్టోబర్ 14న ఈ చిత్రాన్ని ప్రేక్షకుల ముందుకు తీసుకురానున్నారు. ఇప్పటికే విడుదలైన ఈ సినిమా టీజర్ - పాటలు - ట్రైలర్ విశేషంగా ఆకట్టుకున్నాయి. చిత్ర ట్రైలర్ యూట్యూబ్ లో మిలియన్ల వ్యూస్ తో దూసుకుపోతోంది. ఈ నేపథ్యంలో ట్రేడ్ సర్కిల్స్ లో ఈ సినిమాపై ఉన్న బజ్ వల్ల విడుదలకు ముందే మంచి బిజినెస్ చేసినట్లు తెలుస్తోంది.

'మహా సముద్రం' సినిమా డిజిటల్ హక్కులను ప్రముఖ ఓటీటీ ఫ్లాట్ ఫార్మ్ నెట్‌ ఫ్లిక్స్ ఫ్యాన్సీ ధరకు దక్కించుకున్నట్లు టాక్ వినిపిస్తోంది. గత కొంతకాలంగా తెలుగు కంటెంట్ మీద ఫోకస్ పెట్టిన ఓటీటీ దిగ్గజం.. దాదాపు 11 కోట్లకు ఈ సినిమా రైట్స్ కొనుగోలు చేసినట్లు ప్రచారం జరుగుతోంది. ఇదే కనుక నిజమైతే శర్వానంద్ కెరీర్‌ లో ఇదొక బిగ్ డిజిటల్ డీల్ అని చెప్పవచ్చు.

ఏకే ఎంటర్‌టైన్‌మెంట్స్ బ్యానర్‌ పై సుంకర రామబ్రహ్మం 'మహా సముద్రం' చిత్రాన్ని నిర్మిస్తున్నారు. చైతన్య భరద్వాజ్ ఈ సినిమాకి సంగీతం సమకూరుస్తున్నారు. రాజ్ తోటా సినిమాటోగ్రఫీ అందించగా.. ప్రవీణ్ కేఎల్ ఎడిటింగ్ వర్క్ చేస్తున్నారు. కొల్లా అవినాష్ ప్రొడక్షన్ డిజైనర్. జగపతి బాబు - రావు రమేష్ - కేజీయఫ్ గరుడ రామ్ - శరణ్య ఈ చిత్రంలో కీలక పాత్రలు పోషిస్తున్నారు.

ఇకపోతే 'మహాసముద్రం' చిత్రానికి పోటీగా దసరా బరిలో మరో రెండు సినిమాలు దిగుతున్నాయి. అఖిల్ అక్కినేని 'మోస్ట్ ఎలిజిబుల్ బ్యాచిలర్' మరియు నాగశౌర్య 'వరుడు కావలెను' చిత్రాలు అక్టోబర్ 15న థియేట్రికల్ రిలీజ్ అవుతున్నాయి. ఈ మూడు సినిమాలు కూడా వేటికవే విభిన్నమైన జోనర్స్ లో రూపొందుతున్నాయి. మరి వీటిలో ఏవి ప్రేక్షకులను మెప్పిస్తాయో చూడాలి.