'మహా సముద్రం' సెన్సార్ పూర్తి..!

'ఆర్‌ఎక్స్‌ 100' సినిమాతో దర్శకుడిగా నిరూపించుకున్న అజయ్‌ భూపతి తెరకెక్కిస్తున్న తాజా చిత్రం ''మహా సముద్రం''. శర్వానంద్‌ - సిద్థార్థ్‌ హీరోలుగా నటిస్తున్న ఈ చిత్రంలో అదితీరావు హైదరి - అను ఇమ్మాన్యుయేల్‌ లు హీరోయిన్లు. ఏకే ఎంటర్టైన్మెంట్స్ బ్యానర్ పై రూపొందిన ఈ చిత్రాన్ని దసరా కానుకగా అక్టోబర్ 14న ప్రేక్షకుల ముందుకు తీసుకొస్తున్నారు. ఈ నేపథ్యంలో మేకర్స్ శరవేగంగా ప్రమోషన్స్ చేస్తున్నారు. ఈ క్రమంలో తాజాగా సినిమాకు సంబంధించిన సెన్సార్ కార్యక్రమాలు కూడా పూర్తైనట్లు చిత్ర బృందం వెల్లడించింది.

'మహా సముద్రం' చిత్రానికి సెన్సార్ బోర్డ్ వారు 'U/A' (యూ/ఏ) సర్టిఫికెట్ జారీ చేశారు. ఈ విషయాన్ని వెల్లడిస్తూ మేకర్స్ తాజాగా కొత్త పోస్టర్ ని రిలీజ్ చేశారు. సినిమాలోని ఏడు ప్రధాన పాత్రలు ఇందులో కనిపిస్తున్నాయి. ఇంటెన్స్ లవ్ అండ్ యాక్షన్ డ్రామాగా ఈ సినిమా రూపొందింది. ఇప్పుడు సెన్సార్ సర్టిఫికెట్ ను బట్టి ఇందులో అన్ని వర్గాల ప్రేక్షకులను ఆకట్టుకునే అంశాలు ఈ చిత్రంలో ఉన్నట్లు అర్థం అవుతోంది.

ఇప్పటికే 'మహా సముద్రం' చిత్రం నుంచి విడుదలైన టీజర్ - ట్రైలర్ - సాంగ్స్ విశేష స్పందన తెచ్చుకున్నాయి. ముఖ్యంగా ట్రైలర్ యూట్యూబ్ లో 8.2 మిలియన్లకు పైగా వ్యూస్ తో దూసుకుపోతోంది. మరో వారం రోజుల్లో ఈ సినిమా థియేటర్లలోకి రానున్న నేపథ్యంలో గ్రాండ్ గా ప్రీ రిలీజ్ ఈవెంట్ చేయడానికి మేకర్స్ సన్నాహాలు చేశారు. రేపు (అక్టోబర్ 9) ఆదివారం సాయంత్రం 6 గంటలకు JRC కన్వెన్షన్ హాల్ లో ఈ వేడుక జరుగనుందని చిత్ర బృందం ఇదివరకే ప్రకటించింది.

'మహా సముద్రం' చిత్రాన్ని సుంకర రామబ్రహ్మం ప్రతిష్టాత్మకంగా భారీ బడ్జెట్ తో నిర్మించారు. చేతన్ భరద్వాజ్ ఈ సినిమాకి సంగీతం సమకూర్చారు. రాజ్ తోట సినిమాటోగ్రఫీ అందించగా.. ప్రవీణ్ కేఎల్ ఎడిటింగ్ వర్క్ చేశారు. కొల్లా అవినాష్ దీనికి ప్రొడక్షన్ డిజైనర్. ఈ చిత్రంలో జగపతి బాబు - రావు రమేష్ - కేజీయఫ్ గరుడ రామ్ - శరణ్య తదితరులు ఇతర కీలక పాత్రల్లో నటించారు. ఇందులో శర్వా - సిద్దార్థ్ ఇంటెన్స్ పాత్రల్లో నటించారు. ఇద్దరి రోల్స్ పోటాపోటీగా ఉంటాయని ఇప్పటి వరకు వచ్చిన ప్రమోషనల్ కంటెంట్ ని బట్టి అర్థం అవుతుంది. అలానే మిగతా ప్రధాన పాత్రలకి కూడా అజయ్ భూపతి కథలో అధిక ప్రాధాన్యత ఇచ్చారని తెలుస్తోంది. మరి భారీ అంచనాల మధ్య రాబోతున్న 'మహా సముద్రం' చిత్రానికి ఆడియన్స్ అలల తాకిడి ఏ విధంగా ఉంటుందో చూడాలి.