మహర్షి యానిమేటెడ్ వెర్షన్.. వంశీ ప్రశంసలు

స్టార్ హీరోలకు భారీ ఫ్యాన్ ఫాలోయింగ్ ఉంటుంది. అదే సూపర్ స్టార్ మహేష్ బాబుకు అయితే మామూలు స్టార్లకుండే ఫాలోయింగ్ కు నాలుగింతలు ఫాలోయింగ్ ఉంటుంది. మహేష్ సినిమా కోసం వాళ్ళు ప్రతిసారి ఏడాది వేచి చూడాల్సి ఉంటుంది. అందుకే ఫస్ట్ లుక్.. టీజర్.. ట్రైలర్.. లిరికల్ సాంగ్.. ఇలా ఏది రిలీజ్ అయినా పండగే. వీటికి ఫ్యాన్ మేడ్ వెర్షన్స్ కూడా ఉంటాయి.

కొన్ని ఫ్యాన్ మేడ్ టీజర్లు ట్రైలర్లను చూస్తే అవి నిర్మాతలే రిలీజ్ చేశారా అనిపించక మానదు. అంతలా క్రియేటివిటీ చూపిస్తారు. రీసెంట్ గా మహేష్ బాబు తాజా చిత్రం 'మహర్షి' సినిమా టీజర్ రిలీజ్ అయింది. అభిమానులనే కాక ప్రేక్షకులందరినీ మెప్పించింది. సరిగ్గా ఈ టీజర్ కే యానిమేటెడ్ వెర్షన్ తయారు చేశాడు ఒక మహేష్ అభిమాని. ఒరిజినల్ టీజర్లో ఉండే వాయిస్.. బ్యాక్ గ్రౌండ్ స్కోర్ అలానే ఉంచుతూ విజువల్స్ మాత్రం యానిమేషన్ ఉంటుందన్నమాట. ఈ అభిమాని చేసిన యానిమేటెడ్ టీజర్ కు సోషల్ మీడియాలో నెటిజనులకు విపరీతంగా నచ్చింది. ఇక ఈ టీజర్ ఏకంగా 'మహర్షి' దర్శకుడు వంశీ పైడిపల్లి కంటపడడంతో తన ట్విట్టర్ ఖాతా ద్వారా షేర్ చేసి యానిమేటెడ్ టీజర్ చాలా బాగుందని ఆ అభిమానిని ప్రశంసించాడు. సోషల్ మీడియాలో ఇప్పుడీ టీజర్ వైరల్ గా మారింది.

మహేష్ బాబు కెరీర్లో ల్యాండ్ మార్క్ 25వ చిత్రం కావడంతో 'మహర్షి' పై ప్రేక్షకుల్లో భారీ అంచనాలు ఉన్నాయి. పూజ హెగ్డే హీరోయిన్ గా నటిస్తున్న ఈ సినిమాలో అల్లరి నరేష్ ఒక కీలక పాత్రలో నటిస్తున్నాడు. దేవీ శ్రీప్రసాద్ ఈ చిత్రానికి సంగీత దర్శకుడు. 'మహర్షి' మే 9 న రిలీజ్ కానుంది.