మహర్షి ఓవర్సీస్ రైట్స్ డీల్ క్లోజ్

సూపర్ స్టార్ మహేష్ బాబు నటిస్తున్న 'మహర్షి' మే 9 న రిలీజ్ కానుంది. దీంతో ప్రమోషన్ కార్యక్రమాలు కూడా మొదలయ్యాయి. ఇప్పటికే ఈ సినిమానుండి ఫస్ట్ సాంగ్ ను కూడా రిలీజ్ చేశారు. ఇదిలా ఉంటే ఈ సినిమాకు సంబంధించిన ప్రీ రిలీజ్ బిజినెస్ కూడా భారీగా జరిగిందనే వార్తలు వస్తున్నాయి. కానీ ఓవర్సీస్ లో మాత్రం డీల్ చాలా రోజుల నుండి ఇంకా క్లోజ్ కాలేదు. తాజాగా ఈ డీల్ కూడా క్లోజ్ అయిందని సమాచారం.

గ్రేట్ ఇండియా ఫిలిమ్స్ వారు 11.5 కోట్లకు ఓవర్సీస్ రైట్స్ ను సొంతం చేసుకున్నారట. అమెరికాతో పాటుగా ఆస్ట్రేలియా.. గల్ఫ్ తో పాటుగా మిగతా ఓవర్సీస్ రైట్స్ కలిపి ఈ డీల్ ఫైనలైజ్ అయింది. ఒకవేళ సినిమా కనుక 16 కోట్లకు పైగా ఓవర్సీస్ కలెక్షన్స్ సాధించిన పక్షంలో నిర్మాతలకు లాభాలలో షేర్ ఉంటుందని సమాచారం. నిజానికి మహేష్ బాబు సినిమాకు 11.5 కోట్ల రూపాయల డీల్ తక్కువే. కానీ మహేష్ బాబు సినిమాల ఓవర్సీస్ రైట్స్ ను ఎక్కువ ధరకు అమ్ముతూ ఉండడంతో డిస్ట్రిబ్యూటర్లకు రికవరీ ఉండడం లేదు. అందుకే 'మహర్షి' ఓవర్సీస్ కు నిర్మాతలు 16 కోట్ల రూపాయలు కోట్ చేసినప్పటికీ డిస్ట్రిబ్యూటర్లు మాత్రం ముందుకు రాలేదు. ఫైనల్ గా 11.5 కోట్లకు బేరం కుదిరింది.

ఈ సినిమాలో మహేష్ బాబుకు జోడీగా పూజా హెగ్డే హీరోయిన్ గా నటిస్తోంది. అల్లరి నరేష్ ఈ చిత్రంలో ఒక కీలక పాత్రలో నటిస్తున్నాడు. దేవీశ్రీ ప్రసాద్ సంగీతం అందిస్తున్నాడు. దిల్ రాజు.. అశ్విని దత్.. పీవీపీ ఈ సినిమా ను సంయుక్తంగా నిర్మిస్తున్నారు.