'మహాసముద్రం' లోని మాస్ సాంగ్: 'హే రంభా రంభా..'

యువ హీరో శర్వానంద్ - బొమ్మరిల్లు సిద్ధార్థ్ కలిసి నటిస్తున్న భారీ మల్టీస్టారర్ మూవీ ''మహాసముద్రం''. దర్శకుడు అజయ్ భూపతి ఈ చిత్రాన్ని ఒక ఇంటెన్స్ లవ్ అండ్ యాక్షన్ ఎంటర్టైనర్ గా రూపొందిస్తున్నారు. ఇప్పటికే షూటింగ్ పూర్తి చేసుకున్న ఈ చిత్రానికి సంబంధించిన పోస్ట్ ప్రొడక్షన్ కార్యక్రమాలు శరవేగంగా జరుగుతున్నాయి. ఇప్పటి వరకు ఈ చిత్రం నుంచి విడుదలైన ప్రచార చిత్రాలు మంచి స్పందన తెచ్చుకున్నాయి. ఈ క్రమంలో మ్యూజికల్ ప్రమోషన్స్ లో భాగంగా తాజాగా ఈ శుక్రవారం 'హే రంభా' అనే ఫస్ట్ సాంగ్ లిరికల్ వీడియోని చిత్ర యూనిట్ రిలీజ్ చేసింది.

'హే మందే ఇక మందే.. ఇశాఖపట్నం బీచు.. తాగొచ్చు ఊగొచ్చు.. ఏదైనా చేయొచ్చు..' అంటూ సాగిన ఈ సాంగ్ మాసీగా ఉంది. దీనికి చైతన్య భరద్వాజ్ ట్యూన్ కంపోజ్ చేయడమే కాకుండా స్వయంగా ఆలపించారు. 'ఓ రంభా రంభా హే రంభా హే రంభా.. ఎక్కదే గుడుంబా..' అంటూ లిరిసిస్ట్ భాస్కరభట్ల దీనికి సాహిత్యం అందించారు. జాతర నేపథ్యంలో వైజాగ్ బీచ్ లో చిత్రీకరించిన ఈ పాటలో ఎవర్ గ్రీన్ హీరోయిన్ రంభ ఫ్లెక్సీలు కటౌట్లు కనిపిస్తున్నాయి.

శర్వానంద్ - జగపతిబాబు లపై షూట్ చేయబడిన 'హే రంభా రంభా' సాంగ్ లో ఇద్దరూ మాస్ గెటప్స్ లో వేసిన స్టెప్పులు అలరిస్తున్నాయి. దీనికి జానీ మాస్టర్ కొరియోగ్రఫీ చేశారు. ఈ పాట నటి రంభకు స్పెషల్ మాసీ ట్రిబ్యూట్ గా చిత్ర యూనిట్ పేర్కొన్నారు. దీని కోసం ముందుగా రంభ పర్మిషన్ కూడా తీసుకున్నట్లు తెలుస్తోంది. 'మహాసముద్రం' చిత్రానికి ఈ మాస్ సాంగ్ స్పెషల్ గా నిలిచే అవకాశం ఉంది.

'మహాసముద్రం' చిత్రానికి రాజ్ తోటా సినిమాటోగ్రఫీ అందిస్తున్నారు. ప్రవీణ్ కేఎల్ ఎడిటింగ్ వర్క్ చేస్తుండగా.. కొల్లా అవినాష్ ప్రొడక్షన్ డిజైనింగ్ చేస్తున్నారు. ఏకే ఎంటర్టైన్మెంట్స్ బ్యానర్ పై సుంకర రామబ్రహ్మం ఈ చిత్రాన్ని నిర్మిస్తున్నారు. ఇందులో అదితి రావు హైదరి - అను ఇమ్మాన్యుయేల్ హీరోయిన్లుగా నటిస్తున్నారు. జగపతి బాబు - రావు రమేష్ - గరుడ రామ్ కీలక పాత్రలు పోషిస్తున్నారు. త్వరలోనే ఈ చిత్రాన్ని థియేటర్లలోకి తీసుకురానున్నారు.