మహేష్ 26 ఇక అఫీషియల్

భరత్ అనే నేను సక్సెస్ ని ఎంజాయ్ చేస్తున్న మహేష్ బాబు తర్వాత సినిమాల గురించి క్లారిటీతోనే ఉన్నప్పటికీ ఏది ముందు ఏది వెనుక అనే విషయంలో మాత్రం కొంత సంశయం ఉంది. ఇప్పుడు వాటికి తెర వీడుతోంది. త్వరలో వంశీ పైడిపల్లి సినిమా సెట్స్ లో అడుగు పెట్టనున్న మహేష్ దాని తర్వాత సుకుమార్ తో కాని సందీప్ రెడ్డి వంగా తో కాని చేస్తాను అని ప్రెస్ మీట్ లో చెప్పిన సంగతి తెలిసిందే. ఇప్పుడు ఇది అధికారికంగా ఫిక్స్ అయిపోయింది. మహేష్ 26వ సినిమాను మైత్రి మూవీ మేకర్స్ సంస్థ సుకుమార్ దర్శకత్వంలో నిర్మించబోతున్నట్టుగా ప్రకటించింది. సో వంశీ పైడిపల్లిది పూర్తవ్వగానే ఇది స్టార్ట్ చేస్తారు. రంగస్థలం టైంలోనే సుక్కుతో మరో సినిమా కూడా చేసేందుకు మైత్రి సంస్థ ఒప్పందం చేసుకుందన్న వార్తలు గతంలో వచ్చాయి. ఇప్పుడు అవే నిర్ధారణ అయ్యాయి.

సుకుమార్ తన రెగ్యులర్ స్టైల్ ని వదిలి చేసిన రంగస్థలం ఇండస్ట్రీ హిట్ సాధిస్తే తొలిసారి పొలిటికల్ బ్యాక్ డ్రాప్ లో మహేష్ నటించిన భరత్ అనే నేను కూడా అదే దారిలో ఉంది. సో ఈ ఇద్దరు కలవడం అంటే క్రేజ్ మామూలుగా ఉండదు. 1 నేనొక్కడినే విషయంలో తన వైపు నుంచే కొన్ని పొరపాట్లు జరిగాయని ఒప్పుకున్న సుకుమార్ ఈసారి మాత్రం అదిరిపోయే హిట్ ఇస్తానని ముందే చెప్పాడు. సో రంగస్థలం ద్వారా తన పొటెన్షియల్ ఎందులో ఉందో గుర్తించిన సుకుమార్ మహేష్ మూవీ గురించి ఎన్ని జాగ్రత్తలు తీసుకుంటాడో ప్రత్యేకంగా చెప్పనక్కర్లేదు. పైగా తీసిన మూడు సినిమాలు ఇండస్ట్రీ హిట్స్ కొట్టిన మైత్రి సంస్థ తొలి సినిమా హీరో మహేష్ బాబే. ఆ రకంగా కూడా సెంటిమెంట్ కలిసి వస్తోంది. ప్రస్తుతం అమెరికాలో ఉన్న సుకుమార్ స్క్రిప్ట్ వర్క్ త్వరలోనే మొదలు పెట్టబోతున్నట్టు టాక్. టెక్నికల్ టీం డీటెయిల్స్ తెలియడానికి మరికొంత సమయం పట్టవచ్చు.