మహేష్ బాబు మల్టిప్లెక్స్ ఓపెనింగ్ ఆ రోజే

సూపర్ స్టార్ మహేష్ బాబు మల్టిప్లెక్స్ బిజినెస్ లోకి అడుగుపెడుతున్నాడన్న సంగతి తెలిసిందే. మొదటి మల్టిప్లెక్స్ గచ్చిబౌలి ఏరియాలో నిర్మాణంలో ఉంది. గచ్చిబౌలి నుండి కొత్తగూడ క్రాస్ రోడ్ కు వచ్చేదారిలో మెయిన్ రోడ్ మీద నిర్మాణం జరుపుకుంటున్న ఒక భారీ మాల్ లో ఈ మల్టిప్లెక్స్ ఉంది.

ఏషియన్ సినిమాస్ సునీల్ నారంగ్ తో కలిసి మహేష్ బాబు జాయింట్ వెంచర్ గా టేకప్ చేసిన ఈ మల్టిప్లెక్స్ బిజినెస్ ను 'AMB సినిమాస్' బ్రాండ్ తో రెండు తెలుగు రాష్ట్రాలలో విస్తరించేందుకు భారీ ప్రణాళికలు ఉన్నాయట. ఇక తాజా సమాచారం ప్రకారం గచ్చిబౌలి లోని ఏఎమ్బీ సినిమాస్ మొదటి మల్టిప్లెక్స్ ను నవంబర్ 8 న ప్రారంభించేందుకు ముహూర్తం ఖరారు అయిందట.

మహేష్ బాబు ప్రస్తుతం అమెరికాలో 'మహర్షి' షూటింగ్ లో పాల్గొంటున్నాడు. మహేష్ బాబు చేతుల మీదుగానే ఈ మల్టిప్లెక్స్ ప్రారంభోత్సవం జరుగుతుందని అంటున్నారు కాబట్టి షూటింగ్ కు ఒక షార్ట్ బ్రేక్ ఇచ్చి హైదరాబాద్ వస్తాడేమో మన సూపర్ స్టార్. ఇంకెందుకు ఆలస్యం.. నవంబర్ 8 న రిలీజ్ అయ్యే 'థగ్స్ ఆఫ్ హిందూస్తాన్'.. 'సర్కార్' సినిమాలను మహేష్ బాబు మల్టిప్లెక్స్ లో చూసేందుకు ప్లాన్ చేసుకోండి(*నవంబర్ 8 న మీరు హైదరాబాద్ లో ఉండి.. ఆ సమయానికి ఫ్రీగా ఉంటేనే!!!).