మహేష్ - నరేష్ పాత్రలు ఇవా

ఇంకా మొదలుకాకుండానే వంశీ పైడిపల్లి దర్శకత్వంలో మహేష్ బాబు చేయబోయే సినిమా ఆసక్తి రేపుతోంది. ఈ మధ్య బయట కనిపించడం బొత్తిగా మానేసిన మహేష్ మొదటిసారి పూర్తి గెడ్డం తో ఎయిర్ పోర్ట్ లో వస్తుండగా తీసిన ఫోటోల ద్వారా లుక్ లీక్ అవ్వడంతో మొత్తానికి తన గెటప్ గురించి ఒక అవగాహన వచ్చేసింది. బాలన్స్ ఏదైనా ఉంటే మహేష్ కొత్త లుక్ సమ్మోహనం ప్రీ రిలీజ్ ఈవెంట్ లో కనులారా చూడొచ్చు. భరత్ అనే నేనులో ముఖ్యమంత్రిగా మెప్పించి సాలిడ్ హిట్ కొట్టిన మహేష్ ఈ కొత్త సినిమాలో మాస్ పాత్రను చేయబోతున్నట్టు గతంలోనే న్యూస్ ఫీడ్ వచ్చింది. తాజా అప్ డేట్ ఏంటంటే ఇందులో మహేష్ తో పాటు నటిస్తున్న అల్లరి నరేష్ ఈ ఇద్దరు కృష్ణుడు కుచేలుడు పోలిన పాత్రలు చేస్తున్నారట. కాకపోతే అది మహాభారతం. ఇది ఆధునిక సినిమా భారతం. మరి కృష్ణుడు ఎవరు కుచేలుడు ఎవరు అనే సందేహం రావడం సహజం.

మహేష్ అందాన్ని బట్టి కృష్ణుడని, నరేష్ చేసిన పాత్రలను బట్టి కుచేలుడు అనుకుంటే పొరబడినట్టే. వంశీ ఇక్కడే తెలివిగా రాసుకున్నాడు. ఇవి రివర్స్ రోల్స్. మహేష్ కుచేలుడిగా డబ్బు లేని పాత్ర చేస్తుండగా నరేష్ డబ్బున్న వాడిగా మహేష్ ప్రాణ స్నేహితుడిగా నటిస్తాడట. గతంలో ఇలాంటి లైన్ తో కొన్ని సినిమాలు వచ్చాయి కానీ వంశీ పైడిపల్లి చాలా డిఫరెంట్ బ్యాక్ డ్రాప్ తో ఊహకందని మలుపులతో దీన్ని రాసుకున్నట్టు తెలిసింది. ఫామిలీ ఎమోషన్స్ కు కూడా ఇందులో పెద్ద పీట వేయనున్నట్టు వినికిడి. ఎవడు ద్వారా యాక్షన్ సినిమాను బృందావనం ద్వారా ఫామిలీ సినిమాను జానర్ ఏదైనా ఈజీగా డీల్ చేయగలను అని ప్రూవ్ చేసిన దర్శకుడు కాబట్టి వంశీ పైడిపల్లి మీద నమ్మకం పెట్టుకోవచ్చు. పివిపి కోర్ట్ వ్యవహారం వల్ల ఆలస్యం అయ్యే అవకాశం ఉందనే వార్త విన్పిస్తున్నా షూటింగ్ మాత్రం అతిత్వరలో మొదలుపెట్టేలా నిర్మాతలు దిల్ రాజు-అశ్విని దత్ లు ఏర్పాట్లు చేస్తున్నారు. పాతికవ సినిమా కాబట్టి చాలా స్పెషల్ గా ఉండేలా స్క్రిప్ట్ ని రాసుకున్నట్టు తెలిసింది.