మ‌హేష్.. నాని సైరాపై ప్ర‌శంస‌లు

మెగాస్టార్ చిరంజీవి న‌టించిన చారిత్రాత్మ‌క చిత్రం `సైరా న‌ర‌సింహారెడ్డి`. భారీ అంచ‌నాల న‌డుమ‌ ప్ర‌పంచ వ్యాప్తంగా విడుద‌లైన ఈ సినిమాపై స‌ర్వ‌త్రా పాజిటివ్ టాక్ వినిపించింది. చిరంజీవి సైరా పాత్ర‌లో న‌టించ‌లేద‌ని.. జీవించార‌ని.. ఆయ‌న న‌ట‌న సినిమాకు ప్ర‌ధాన హైలైట్ గా నిలిచింద‌ని ప్ర‌శంస‌ల వ‌ర్షం కురిపిస్తున్నారు. ఇండ‌స్ట్రీకి సంబంధించిన క్రేజీ హీరోలు కూడా `సైరా`ని ఆకాశానికి ఎత్తేశారు. సోష‌ల్ మీడియాలో యాక్టివ్ గా వుండే సూప‌ర్ స్టార్ మ‌హేష్.. నేచుర‌ల్ స్టార్ నాని సినిమాతో పాటు చిరంజీవిపై ప్ర‌శంస‌లు కురిపించారు. ఇటీవ‌ల జరిగిన ఓ ఈ వెంట్‌లో `సైరా` చిత్రాన్ని వుద్దేశించి `మీ సినిమా కోసం ఎదురుచూస్తున్నాం సార్‌` అంటూ మ‌హేష్ స్టేజ్ మీదే ఓపెన్ గా చెప్పేయ‌డంతో చిరంజీవి చిరున‌వ్వులు చిందించిన విష‌యం తెలిసిందే.

గ‌త కొంత కాలంగా టాలీవుడ్ లో ఏ సినిమా విడుద‌లైనా సినిమా బాగుంటే ఖ‌చ్చితంగా సోష‌ల్ మీడియా ద్వారా మ‌హేష్ ప్ర‌శంసలు కురిపిస్తున్నారు. మ‌రీ బాగుంటే త‌న ట్వీట్ ల‌తో ప్రచారం కూడా చేస్తున్నారు. తాజాగా ఉయ్యాల‌వాడ న‌ర‌సింహారెడ్డి జీవిత క‌థ ఆధారంగా తెర‌పైకొచ్చిన చిత్రం `సైరా` పై కూడా ప్ర‌శంస‌లు కురిపించారు. బుధవారం సినిమా చూసిన మ‌హేష్ సోష‌ల్ మీడియా వేదిక‌గా `సైరా` త‌ప్ప‌క చూడాల్సిన చిత్ర‌మ‌ని ట్వీట్ చేశాడు. `సినిమాని నిర్మించిన తీరు.. గ్రాండ్ విజువ‌ల్స్‌ వీట‌న్నింటికి మించి తన అద్భుత‌మైన న‌ట‌న‌తో చిరంజీవిగారు అంద‌నంత ఎత్తులో క‌నిపించారు. ఇంత మంచి చిత్రాన్ని నిర్మించిన రామ్ చ‌ర‌ణ్‌.. దర్శ‌కుడు సురేంద‌ర్ రెడ్డికి కంగ్రాట్స్. ర‌త్న‌వేలు ఫొటోగ్ర‌ఫీ గురించి మ‌హేష్ ప్ర‌త్యేకంగా అభినందించారు. ర‌త్న‌వేలు అందించిన ఫొటోగ్ర‌ఫీ అద్భుతంగా వుంది. ఈ మ‌ధ్య కాలంలో ఇదే ది బెస్ట్‌`` అని అభివ‌ర్ణించారు.

ఇండ‌స్ట్రీలో ప్ర‌తి హీరో ఫ్యాన్స్ త‌న ఫ్యాన్సే అనేంత‌గా ఆక‌ట్టుకునే నేచుర‌ల్ స్టార్ నాని కూడా `సైరా`పై స్పందించాడు. `గ్యాంగ్ లీడ‌ర్` టైటిల్ కార‌ణంగా మెగా ఫ్యాన్స్ ఆగ్ర‌హాన్ని చ‌విచూసిన యంగ్ హీరో నాని `సైరా`పై సోష‌ల్ మీడియా ట్విట్ట‌ర్ లో స్పందించారు. నాని ప్ర‌స్తుతం దిల్ రాజు నిర్మిస్తున్న `వీ` సినిమా చిత్రీక‌ర‌ణ‌లో వున్నారు. తాను ప్ర‌స్తుతం సౌత్ కొరియాలో వున్నాన‌ని చెప్పిన నాని.. `సైరా` చూడ‌లేక‌పోయాన‌ని అయితే ఇండియాలో బాక్సాఫీస్ ఘ‌రానా మొగుడు ఈజ్ బ్యాక్! అనే టాక్ మాత్రం వినిపించింద‌ని ట్వీట్ చేశాడు. ``సినిమా చూడ‌కుండా ఆగ‌లేను.. చిరంజీవిగారికి నా బిగ్ హ‌గ్‌`` అని ట్వీట్ చేశారు. మ‌హేష్- రాజ‌మౌళి-నాని.. ఒక‌రేమిటి సెల‌బ్రిటీలంతా సైరాపై ప్ర‌శంస‌లు కురిపిస్తున్నారు.