కళ్యాణ్ రామ్ సినిమాలో పవన్, మహేష్

సినీ పరిశ్రమ ఓ కుటుంబం, మేమందరం కళామతల్లి బిడ్డలం అంటూ కబుర్లు బాగానే చెబుతారు కానీ.. నిజానికి పరిశ్రమలో పెద్ద ఫ్యామిలీల మధ్య ఉన్న విభేదాల గురించి జనాలకు తెలియంది కాదు. ఒక ఫ్యామిలీకి చెందిన హీరోల మధ్యే విభేదాలున్నపుడు.. వేర్వేరు ఫ్యామిలీల హీరోల మధ్య గొడవల గురించి చెప్పాల్సిన పని లేదు. అప్పుడప్పుడూ ఈ హీరోలైనా కలుస్తారేమో కానీ.. అభిమానులు మాత్రం కలవరు. ఎప్పుడూ కొట్టుకుంటూనే ఉంటారు. తమ హీరోల సినిమాల్లో వేరే హీరోల రెఫరెన్సులు రావడాన్ని అస్సలు జీర్ణించుకోలేరు అభిమానులు. ఐతే ఆశ్చర్యకరంగా నందమూరి హీరో కళ్యాణ్ రామ్ సినిమాలో పవన్ కళ్యాణ్ - మహేష్ బాబుల రెఫరెన్సులు కనిపించాయి.

నిన్న విడుదలైన ‘షేర్’ సినిమాలో మహేష్ కనిపించాడు, పవన్ ప్రస్తావన వచ్చింది. విలన్ పెళ్లి కోసం రిహార్సల్స్ జరుగుతున్న టైంలో అలనాటి రామచంద్రుడి కన్నింట సాటి అనే పాట వినిపిస్తుంది. అప్పుడు మహేష్ బాబును చూపిస్తారు. మరో సన్నివేశంలో బ్రహ్మి పవన్ కళ్యాణ్ ప్రస్తావన తెస్తాడు. ఏంటి నడుమంటే పవన్ కళ్యాణే చూడాలా, మేం చూడకూడదా అని. ఆ సన్నివేశంలో ఎదురుగా కళ్యాణ్ రామ్ ఉంటాడు. ఈ రెండు సన్నివేశాలకూ థియేటర్లలో నందమూరి అభిమానుల నుంచి చిత్రమైన స్పందన వస్తుందని వేరే చెప్పాల్సిన పని లేదు. మరోవైపు తన ప్రతి సినిమాలో లాగే ఇందులోనూ ఎన్టీఆర్ - బాలయ్యల రెఫరెన్సులు కూడా వదిలిపెట్టలేదు కళ్యాణ్ రామ్. ఐతే ఇలాంటి కొసమెరుపులు ఎన్ని ఉన్నా.. ‘షేర్’ సినిమాలో అసలు మేటర్ విషయంలోనే చాలా లోటు చేసేశారు.