మహేష్, సమంత పూజలో ఉన్నారు

మహేష్ బాబు కొత్త సినిమా ‘బ్రహ్మోత్సవం’ మీద రోజు రోజుకూ అంచనాలు పెరిగిపోతున్నాయి. ఈ సినిమాకు సంబంధించి బయటకు వస్తున్న ప్రతి విశేషం ఆసక్తి రేపుతోంది. ఉద్దేశపూర్వకంగా సినిమా యూనిట్ సభ్యులే బయటపెడుతున్నారో లేక ఎవరైనా దొంగచాటుగా ఫొటోలు తీసి నెట్లో పెడుతున్నారో తెలియదు కానీ.. ‘బ్రహ్మోత్సవం’ సినిమాకు సంబంధించిన షూటింగ్ స్పాట్ పిక్స్ భలే ఆసక్తి రేపుతున్నాయి. ఇప్పటికే బయటికి వచ్చిన ఫొటోలు నెట్లో వైరల్ అవుతుండగా.. లేటెస్టుగా సినిమాలోని ప్రధాన పాత్రధారులంతా కలిసి పూజలో పాల్గొంటున్న సన్నివేశానికి సంబంధించిన చిత్రం ముచ్చటగొలుపుతోంది.

మహేష్ బాబుకు ఓ పక్క సమంత చుడీదార్లో కూర్చుని ఉంటే.. ఇంకో పక్క ప్రణీత లంగావోణీలో దర్శనమిస్తోంది. షాయాజి షిండే, తులసి కూడా ఫొటోలో ఉన్నారు. సినిమాలో సన్నివేశంలాగా కాకుండా చాలా సహజంగా కనిపిస్తోందీ ఫొటో. మన సంస్కృతి సంప్రదాయాల్ని తన సినిమాల్లో బాగా ఎలివేట్ చేయడానికి ఇష్టపడే శ్రీకాంత్ అడ్డాల.. ‘బ్రహ్మోత్సవం’లో మరోసారి ఆ అంశాల్ని హైలైట్ చేసేలా కనిపిస్తున్నాడు. రత్నవేలు లాంటి టాప్ సినిమాటోగ్రాఫర్ ఈ సినిమాకు పని చేస్తుండటంతో.. సినిమా ఓ విజువల్ ఫీస్ట్ లా ఉంటుందని అంచనా వేస్తున్నారు. ఇప్పటికే 70 శాతానికి పైగా షూటింగ్ పూర్తి చేసుకున్న ఈ చిత్రం మే నెలలో ప్రేక్షకుల ముందుకొచ్చే అవకాశాలున్నాయి.