సుధీర్ బాబు సినిమాకు సపోర్ట్ గా మహేష్ బాబు..!

సూపర్ స్టార్ మహేష్ బాబు బావ సుధీర్ బాబు హీరోగా నటిస్తున్న తాజా చిత్రం ''శ్రీదేవి సోడా సెంటర్''. 'పలాస 1978' ఫేమ్ కరుణ కుమార్ తెరకెక్కిస్తున్న ఈ చిత్రాన్ని ఆగస్టు 27న గ్రాండ్ గా థియేట్రికల్ రిలీజ్ చేస్తున్నారు. ఈ నేపథ్యంలో ప్రమోషన్స్ స్పీడ్ పెంచిన చిత్ర బృందం.. వరుస అప్డేట్స్ వదులుతూ ఉన్నారు. ఈ క్రమంలో తాజాగా సినిమా ట్రైలర్ కు సంబంధించిన ఓ అనౌన్స్ మెంట్ వీడియోని విడుదల చేశారు.

మహేష్ బాబు ''శ్రీదేవి సోడా సెంటర్'' సినిమా థియేట్రికల్ ట్రైలర్ ను రిలీజ్ చేస్తారని మేకర్స్ ప్రకటించారు. రేపు (ఆగస్టు 19) గురువారం ఉదయం 10 గంటలకు ఈ ట్రైలర్ విడుదల కానుందని వెల్లడించారు. హీరో సుధీర్ బాబు - కమెడియన్ సత్యం రాజేష్ కలిసి సినిమా వాల్ పోస్టర్ అంటిస్తూ ట్రైలర్ అప్డేట్ ఇస్తున్నట్లు రూపొందించిన అనౌన్స్ మెంట్ వీడియో అలరిస్తోంది. ఇప్పటికే యంగ్ రెబల్ స్టార్ ప్రభాస్ ఈ సినిమాకు తన బెస్ట్ విషెస్ అందించారు. ఈ క్రమంలో బావ సినిమా కోసం మహేష్ తన వంతు సపోర్ట్ అందిస్తున్నారు.

ఇప్పటికే విడుదలైన 'శ్రీదేవి సోడా సెంటర్' సినిమా ఫస్ట్ లుక్ - టీజర్‌ మరియు పాటలకు మంచి స్పందన లభించింది. మరి సినిమా ట్రైలర్ ఎలా ఉంటుందో చూడాలి. గ్రామీణ యాక్షన్ ఎంటర్టైనర్ గా తెరకెక్కుతోన్న ఈ చిత్రంలో లైటింగ్ సూరిబాబు పాత్రలో సుధీర్ బాబు కనిపించనున్నారు. ఇందులో తెలుగమ్మాయి ఆనంది హీరోయిన్ గా నటించింది. పావెల్ నవగీతన్ - నరేష్ - సత్యం రాజేష్ - రఘుబాబు - అజయ్ - హర్షవర్ధన్ - సప్తగిరి - రోహిణి తదితరులు ఇతర పాత్రలు పోషించారు.

సంగీత బ్రహ్మ మణిశర్మ ఈ చిత్రానికి సంగీతం సమకూర్చారు. శ్యామ్ దత్ సైనుద్దీన్ సినిమాటోగ్రఫీ అందించగా.. శ్రీకర్ ప్రసాద్ ఎడిటర్ గా వర్క్ చేశారు. 70mm ఎంటర్టైన్మెంట్ పతాకంపై విజయ్ చిల్లా - శశి దేవిరెడ్డి సంయుక్తంగా ''శ్రీదేవి సోడా సెంటర్'' చిత్రాన్ని నిర్మిస్తున్నారు. 'భలే మంచి రోజు' తర్వాత సుధీర్ బాబుతో నిర్మాతలు కలిసి చేస్తున్న రెండో చిత్రం ఇది. మాస్ హీరోగా గుర్తింపు తెచ్చుకోవాలని ట్రై చేస్తున్న సుధీర్ బాబుకు ఈ సినిమా ఎలాంటి విజయాన్ని అందిస్తుందో చూడాలి.