మహేష్ అలాంటి సినిమాకు సెట్టవుతాడా?

సూపర్ స్టార్ మహేష్ బాబు చూడ్డానికి సాఫ్ట్‌గా కనిపించే హీరో. కొన్నిసార్లు మాస్ క్యారెక్టర్లు వేసినప్పటికీ.. మరీ మాస్‌గా మాత్రం చూపించడం కష్టం. అలాగే మహేష్ బాబు లుక్ ప్రకారం చూస్తే.. అతడిని పేదవాడిగా.. పోరాట యోధుడిగా ప్రెజెంట్ చేయడమూ సమస్యే. ఐతే విలక్షణ దర్శకుడు సుకుమార్ మాత్రం.. మహేష్ ను అలాగే చూపించే దిశగా ఆలోచిస్తున్నాడట. సుకుమార్-మహేష్ కాంబినేషన్లో రెండో సినిమాను కొన్ని నెలల కిందటే అనౌన్స్ చేసిన సంగతి తెలిసిందే. ఇంతకుముందు మహేష్ తో తాను తీసిన ‘1 నేనొక్కడినే’ డిజాస్టర్ అయిన నేపథ్యంలో.. ఈసారి ఎట్టి పరిస్థితుల్లోహిట్టివ్వాలనే పట్టుదలతో ఉన్నాడు సుకుమార్. అందుకే కథ విషయంలో ఒక పట్టాన రాజీ పడకుండా పెద్ద ఎత్తునే కసరత్తులు చేస్తున్నారు. విశ్వసనీయ సమాచారం ప్రకారం ఇంకా ఏ కథా కూడా ఫైనలైజ్ కాలేదని సమాచారం.

ఇప్పటికే రెండు మూడు లైన్లు అనుకుని పక్కన పెట్టేసిన సుకుమార్.. కొన్ని రోజులుగా తెలంగాణ సాయుధ పోరాటం చదువుతున్నాడట. ఆ పోరాటాన్నే సినిమాగా తీయకపోయినా.. దాని స్ఫూర్తితో ఒక కల్పిత కథను తయారు చేసి మహేష్‌తో తీద్దామన్నది ఆయన ఆలోచన అట. కానీ మహేష్ బాబు.. సాయుధ పోరాటం అంటే వినడానికి ఏదోలా ఉంటుంది. ఆ పోరాటం నేపథ్యంలో కథ ఎంచుకుంటే మహేష్‌ను కొంచెం ‘రా’గా చూపించాల్సి ఉంటుంది. కానీ అతడికి ఆ తరహా లుక్ సెట్టవదు. కష్టాలు.. కన్నీళ్లు.. పోరాటం అంటేనే మహేష్ బాబు అందులో ఇముడుతాడా అనిపిస్తుంది. అతడి లుక్ అలా ఉంటుంది మరి. ఐతే ‘రంగస్థలం’ సినిమా కోసం రామ్ చరణ్ ను పూర్తిగా మార్చి కొత్తగా చూపించిన సుకుమార్.. మహేష్ బాబుకు కూడా మేకోవర్ ఇవ్వొచ్చని.. సరిగ్గా డీల్ చేస్తే ప్రేక్షకుల నుంచి యాక్సెప్టెన్స్ వస్తుందని భావిస్తున్నాడట. మరి ఈ కథ.. క్యారెక్టర్ ఎలాంటి షేప్ తీసుకుంటాయో చూడాలి.