మహేష్ పోలీసులను ఎందుకు కలిశాడంటే..

బ్రహ్మోత్సవం - స్పైడర్ తర్వాత ఎంతో ఒత్తిడి మధ్య తీసిన ‘భరత్ అనే నేను’ గ్రాండ్ హిట్ అయ్యి మహేష్ బాబుకు ఊపిరిపోసింది. ఆ సినిమా తర్వాత చాలా రిలాక్స్ అయిన మహేష్ తన 25వ సినిమాను మొదలెట్టేశాడు. ఇప్పటికే డెహ్రాడూన్ లో కొన్ని కాలేజీ సీన్లను చిత్రీకరించారు. ప్రస్తుతం హైదరాబాద్ లో ఈ షూటింగ్ కొనసాగుతోంది. ఈ సినిమా కోసం మహేష్ తొలిసారి గడ్డం పెంచి సరికొత్త లుక్ లో కనిపిస్తున్నారు.

కథలో భాగంగా మహేష్ బాబు ఓ విద్యార్థి పాత్రలో నటిస్తున్నాడట. కాలేజీ రోజుల్లో ఓ క్రికెట్ మ్యాచ్ ఆడే సీన్ ఉంది. ఇది సినిమాకే హైలెట్ అట.. దీనికోసం వంశీ పైడిపల్లి చాలా శ్రద్ధ తీసుకొని బాగా వచ్చేందుకు తీవ్ర ప్రయత్నాలు చేస్తున్నారు. ఈ క్రికెట్ మ్యాచ్ ను చిత్రీకరించేందుకే తాజాగా మహేష్ తో కలిసి వంశీ తెలంగాణ పోలీస్ అకాడమీకి వెళ్లినట్టు తెలిసింది. క్రికెట్ మ్యాచ్ తో పాటు ఆ తర్వాత వచ్చే యాక్షన్ సీన్లను ఈ అకాడమీలో చిత్రీకరించేందుకు అనుమతి ఇవ్వాల్సిందిగా పోలీసులను కోరినట్టు విశ్వసనీయ సమాచారం. పోలీసులు కూడా మహేష్ సినిమా షూటింగ్ కు సానుకూలంగా స్పందించినట్టు వార్తలు వస్తున్నాయి.

దిల్ రాజు-పీవీపీ-అశ్వినీదత్ లు కలిసి మహేష్ 25వ సినిమాను ఎక్కడా కాంప్రమైజ్ కాకుండా నిర్మిస్తున్నారు. ఇందుకోసం భారీగా ఖర్చు చేస్తున్నారు. అందులో భాగంగానే తెలంగాణ పోలీస్ అకాడమీలో షూటింగ్ పర్మిషన్ కోసం తాజాగా మహేష్-వంశీ వెళ్లారని తెలిసింది. అల్లరి నరేష్ కూడా ఈ క్రికెట్ మ్యాచ్ ఎపిసోడ్ లో పాల్గొంటాడని సమాచారం.