ఇండస్ట్రీ మనుగడ కోసం మెగా హీరో మూవీకి అండగా నిలుస్తున్న సినీ ప్రముఖులు..!

కరోనా కారణంగా విధించిన లాక్‌ డౌన్‌ తో సినిమా థియేటర్లన్ని మూతపడిపోయి కొన్ని నెలలపాటు సినిమా సందడి లేక వెలవెలబోయాయి. కోవిడ్ నేపథ్యంలో నిబంధనలు పాటిస్తూ సినిమా థియేటర్స్ రీ ఓపెన్ చేసుకోడానికి ప్రభుత్వం నుంచి అనుమతులు వచ్చినప్పటికీ.. థియేట్రికల్ రిలీజ్ కి మేకర్స్ ఎవరూ ముందుకు రాలేదు. 50శాతం సీటింగ్ ఆక్యుపెన్సీతో థియేటర్ తెరవాలనే కండీషన్ ఉండటంతో సినిమాకి రిటర్న్స్ వస్తాయో రావో అనే ఆలోచన మరియు కరోనా భయంతో థియేటర్లకి వచ్చి సినిమా చూసేందుకు జనాలు ఆసక్తి కనబరుస్తారో లేదో అనే అనుమానంతో అందరూ సినిమాల విడుదలకు వెనకాడారు. అయితే ఇలాంటి పరిస్థితుల్లో సుప్రీం హీరో సాయి ధరమ్ తేజ్ తాను నటించిన 'సోలో బ్రతుకే సో బెటర్' చిత్రాన్ని థియేటర్లలో విడుదల చేయడానికి ముందుకొచ్చాడు. సినిమా రైట్స్ సొంతం చేసుకున్న జీ స్టూడియోస్ వారు ఈ చిత్రాన్ని డిసెంబ‌ర్ 25న క్రిస్మస్ సందర్భంగా ప్రేక్షకుల ముందుకు తీసుకొస్తున్నట్లు ప్రకటించారు. కోవిడ్ నేపథ్యంలో కూడా సాంగ్స్ పోస్టర్స్ ట్రైలర్ అంటూ అన్ని విధాలుగా చిత్ర యూనిట్ ప్రమోట్ చేసుకుంటూ వస్తూనే ఉంది. లాక్ డౌన్ తర్వాత థియేటర్స్ లో రిలీజ్ అవుతున్న పెద్ద సినిమా ఇదే కావడంతో దీనిపై బజ్ బాగానే క్రియేట్ అయింది. అయినప్పటికీ కొత్తగా కరోనా స్ట్రెయిన్ అనే మరో భయం పొంచివున్న నేపథ్యంలో జనాలు థియేటర్స్ కి వస్తారా రారో అనే భయం మాత్రం అందరిలో ఉంది. కరోనా బ్రేక్ తర్వాత వస్తున్న మూవీ కావడంతో ఇండస్ట్రీ మొత్తం ఈ సినిమా ఫలితం ఎలా ఉండబోతుందో అని ఆలోచనలో ఉన్నారు. ఈ నేపథ్యంలో ఇండస్ట్రీ మనుగడ కోసం మెగా హీరో మూవీకి అండగా నిలబడడానికి టాలీవుడ్ సినీ ప్రముఖులు ముందుకొస్తున్నారు.

ఇప్పటికే మెగాస్టార్ చిరంజీవి ఈ సినిమా కోసం ట్వీట్ చేశారు. ఈ సినిమాకి లభించే ఆదరణ మొత్తం ఇండస్ట్రీకే స్ఫూర్తిని ఇస్తుందని.. అలాగే ప్రేక్షకులు కూడా మాస్కులు ధరించి సోషల్ డిస్టెన్స్ పాటిస్తూ సినిమా ఎంజాయ్ చేయాలని మెగాస్టార్ సూచించారు. తాజాగా సూపర్ స్టార్ మహేష్ బాబు కూడా తన బాధ్యతగా సాయి తేజ్ సినిమాని ప్రమోట్ చేయడానికి ముందుకొచ్చాడు. ''క్రిస్మస్ సందర్భంగా విడుదలవుతున్న 'సోలో బ్రతుకే సో బెటర్' చిత్ర బృందానికి నా శుభాకాంక్షలు తెలుపుతున్నాను. మహమ్మారి సమయంలో బిగ్ స్క్రీన్ పైకి వస్తున్న మొదటి చిత్రం.. ఇదొక మైలురాయి. సాయి ధరమ్ తేజ్ కు మరియు టీమ్ మొత్తానికి ఆల్ ది బెస్ట్'' అని మహేష్ ట్వీట్ చేశాడు. అలానే యంగ్ హీరో విజయ్ దేవరకొండ కూడా సోలో సినిమాకి మద్దతుగా నిలిచాడు. థియేటర్స్ మళ్ళీ తెరుచుకోబడ్డాయని.. సినిమాస్ వద్ద సందడి చేయడానికి గ్యాంగ్ మొత్తం రెడీగా ఉండండని.. రేపు రిలీజ్ కాబోతున్న సాయి తేజ్ 'సోలో బ్రతుకే సో బెటర్' టీమ్ కి శుభాకాంక్షలు అంటూ ట్వీట్ చేసాడు విజయ్. అలానే త్వరలో రాబోతున్న రామ్ 'రెడ్'.. రవితేజ్ 'క్రాక్' కోసం ఆతృతగా ఎదురు చేస్తున్నానని చెప్పుకొచ్చాడు. ఇలా ఇండస్ట్రీ సభ్యులందరూ సాయితేజ్ టీమ్ కి అండగా నిలుస్తూ విషెష్ చెప్తున్నారు. ఇలానే మిగతా సినీ ప్రముఖులు కూడా ఇలాంటి పరిస్థితుల్లో థియేటర్స్ లో విడుదలకు వస్తున్న సాయి తేజ్ సినిమాకి సపోర్ట్ గా నిలవాలని సినీ అభిమానులు కోరుకుంటున్నారు.