మహేష్ ఈ గ్యాప్ లో మరో సినిమా చేయనున్నాడా..?

సూపర్ స్టార్ మహేష్ బాబు ప్రస్తుతం 'సర్కారు వారి పాట' సినిమా చేస్తున్న సంగతి తెలిసిందే. పరశురామ్ పేట్ల దర్శకత్వంలో తెరకెక్కుతున్న ఈ చిత్రాన్ని వచ్చే ఏడాది సంక్రాంతికి విడుదల చేసేలా షూటింగ్ చేస్తున్నారు. దీని తర్వాత దర్శకధీరుడు రాజమౌళి దర్శకత్వంలో మహేష్ ఓ భారీ బడ్జెట్ సినిమా చేయనున్నాడు. ప్రస్తుతం రూపొందిస్తున్న 'ఆర్.ఆర్.ఆర్' విడుదలైన తర్వాతే మహేష్ సినిమా గురించి ఆలోచిస్తానని జక్కన్న క్లారిటీ ఇచ్చేశాడు. దసరాకి ఈ సినిమా రిలీజ్ అవుతుంది కాబట్టి.. మహేష్ - రాజమౌళి కాంబోలో సినిమా సెట్స్ పైకి వెళ్ళడానికి చాలా సమయమే పట్టేలా ఉంది. అందుకే ఈ గ్యాప్ లో మహేష్ మరో సినిమా చేయనున్నాడని ఫిలిం సర్కిల్స్ లో టాక్ వినిపిస్తోంది.

మహేష్ బాబుతో గతేడాది సంక్రాంతికి 'సరిలేరు నీకెవ్వరు' వంటి బ్లాక్ బస్టర్ సినిమా తీసిన డైరెక్టర్ అనిల్ రావిపూడితో మరో సినిమా చేయనున్నాడట. అది కూడా స్పోర్ట్స్ బేస్డ్ మూవీ అని అంటున్నారు. అనిల్ ప్రస్తుతం 'ఎఫ్ 3' షూటింగ్ తో బిజీగా ఉన్నాడు. ఈ సినిమాని ఆగస్ట్ 27న విడుదల చేయనున్నారు. అనిల్ దీని తర్వాత మహేష్ తో ఓ సినిమా స్టార్ట్ చేసి 2022 సమ్మర్ లోపు కంప్లీట్ చేసే అవకాశాలు ఉన్నాయని టాక్ వినిపిస్తోంది. అలానే వంశీ పైడిపల్లి కూడా మహేష్ కోసం ఓ స్క్రిప్ట్ రెడీగా ఉంచుకున్నాడని అంటున్నారు. రాజమౌళితో చేయబోయే పాన్ ఇండియా సినిమా వచ్చే ఏడాది సెకండ్ హాఫ్ దాకా ప్రారంభం అయ్యే ఛాన్స్ లేకపోతే.. దాని కంటే ముందు మహేష్ ఖచ్చితంగా మరో సినిమా చేస్తాడని స్ట్రాంగ్ బజ్ సినీ వర్గాల్లో నడుస్తోంది.