మ‌హేష్‌ ని ఇంటెలిజెన్స్ ఆఫీస‌ర్‌ ని చేసేశారు

సినిమాకి కొబ్బ‌రికాయ కొట్టేసి... ఇందులో హీరో ఫ‌లానా ప‌ని చేస్తాడు, అత‌ని క్యారెక్ట‌ర్ ఇలా ఉంటుంద‌ని ద‌ర్శ‌కుడు చెప్పేవ‌ర‌కు ఇండ‌స్ట్రీలో ప్ర‌చారం ఆగదు. స్టార్ హీరోల సినిమాల విష‌యంలో అయితే ఈ ప్ర‌చారం మ‌రింత దూకుడుగా సాగుతుంటుంది. అదంట - ఇదంట అని మాట్లాడుకొంటుంటారు. మ‌హేష్ సినిమా విష‌యంలోనూ ఇప్పుడదే జ‌రుగుతోంది. మురుగ‌దాస్‌ - మ‌హేష్‌ లాంటి సూప‌ర్ కాంబినేష‌న్ కాబ‌ట్టి అంద‌రి నుంచీ ఆ సినిమాపై ఆస‌క్తి వ్య‌క్త‌మ‌వుతోంది. దీంతో క‌థ‌పై కూడా ర‌క‌ర‌కాల రూమ‌ర్లు ప్ర‌చారంలోకి వ‌స్తున్నాయి. మొద‌ట ఇది న్యాయ‌వ్య‌వ‌స్థ నేప‌థ్యంలో సాగే క‌థ అనీ, మ‌హేష్ ఓ డిఫ‌రెంట్ గెట‌ప్‌ లో క‌నిపించ‌బోతున్నాడ‌ని మాట్లాడారు.

అయితే మ‌హేష్ మాత్రం ఆ విష‌యాన్ని నిర్ద్వంద్వంగా తోసి పుచ్చాడు. ఇలాంటి రూమ‌ర్లు నేనూ విన్నా, కానీ అదేదీ నిజం కాదు - ఇదొక సెప‌రేట్ క‌థంతే అని చెప్పుకొచ్చాడు. స్వ‌యంగా మ‌హేష్ క్లారిటీ ఇచ్చినా రూమ‌ర్లు మాత్రం ఆగ‌డం లేదు. ఇప్పుడు మ‌రో అడుగు ముందుకేసి ఆయ‌న్ని ఇంటెలిజెన్స్ ఆఫీస‌ర్‌ ని చేసేశారు. మురుగ సినిమాలో మ‌హేష్ ఇంటెలిజెన్స్ ఆఫీస‌ర్‌ గా క‌నిపించ‌బోతున్నాడ‌ని, ఇది ప‌క్కా అని కొద్దిమంది సినిమా జ‌నాలు బ‌ల్ల‌గుద్ది మ‌రీ చెబుతున్నారు. మ‌రి నిజంగా మ‌హేష్ ఆ పాత్ర‌లోనే క‌నిపిస్తాడా? మురుగు స్టోరీని ఏమైనా లీక్ చేశాడా? అనే సందేహాలు వ్య‌క్త‌మ‌వుతున్నాయి. అయితే మ‌హేష్ ఎలా క‌నిపించ‌బోతున్నాడు? ఎలాంటి పాత్ర‌ని పోషిస్తాడు? అనే విష‌యాల‌పై మాత్రం ప‌క్కా క్లారిటీ రావాలంటే సినిమాకి కొబ్బ‌రికాయ కొట్టేవ‌ర‌కైనా ఆగాలి. ఆ రోజు మురుగదాస్‌కానీ, మ‌హేష్ కానీ ఒక‌ట్రెండు విష‌యాలు ఏవైనా స్వ‌యంగా బ‌య‌టపెట్టొచ్చు.