బాలయ్యకు మహేష్ యస్ చెప్తాడా?

నందమూరి బాలకృష్ణ - దర్శకుడు క్రిష్ కాంబినేషన్ లో తెరకెక్కుతున్న ఎన్టీఆర్ బయోపిక్ లో ఇప్పటికే చాలా పాత్రలకు నటులను తీసుకున్నారు. అందులో కొన్ని పాత్రలకు సంబంధించిన ఫస్ట్ లుక్స్ కూడా బయటకు వచ్చాయి. కానీ చాలా రోజుల నుండి సూపర్ స్టార్ కృష్ణ క్యారెక్టర్ లో మహేష్ బాబు నటిస్తాడని గాసిప్స్ వినిపిస్తున్నాయిగానీ ఇంకా ఆ విషయం పై క్లారిటీ రాలేదు.

తాజాగా మరోసారి అదే విషయంలో ఫిలిం నగర్లో గుసగుసలు మొదలయ్యాయి. మహేష్ ప్రస్తుతం అమెరికాలో ఉన్నాడు. 'మహర్షి' సినిమాకు సంబంధించిన తాజా షెడ్యూల్ అక్కడ జరుగుతోంది. బాలయ్య రీసెంట్ గా మహేష్ కు కాల్ చేశారని.. కృష్ణ పాత్ర గురించి మాట్లాడారని అంటున్నారు. మహేష్ మాత్రం నాన్నగారి పాత్రలో నటించే విషయం పై తన నిర్ణయం చెప్పేందుకు కొంత సమయం కావాలన్నాడట.

ఎన్టీఆర్ - కృష్ణ ల మధ్య మొదట్లో చాలా మంచి అనుబంధం ఉన్నప్పటికీ తర్వాత కాలంలో కృష్ణ రాజకీయంగా ఎన్టీఆర్ తో విభేదించారు. అయినప్పటికీ ఇద్దరికి ఒకరింటే ఒకరికి అభిమానం మాత్రం అలాగే ఉండేదట. కృష్ణ పాత్ర సినిమాలో ఉండాల్సిందే అనేది బాలయ్య ఆలోచనట. కానీ మహేష్ ఒప్పుకోని పక్షంలో సినిమా నుండి కృష్ణ పాత్రను తొలగించే ఆలోచనలో దర్శకుడు క్రిష్ ఉన్నాడట. మరి మహేష్ నాన్నగారి పాత్రకు 'యస్' చెప్తాడా లేదా 'నో' చెప్తాడా వేచి చూడాలి. 'భరత్ అనే నేను' సినిమాలో ఒక సీన్లో మహేష్ మీసం పెట్టుకుంటే అచ్చం నాన్నగారిలానే ఉన్నారని అందరూ అన్నారు. మరి ఎన్టీఆర్ కోసం మరో సారి మీసం పెట్టుకుంటాడా.. లేదా?