భరత్ అను నేను ఫస్ట్ లుక్ ఆ రోజే..

ఈ ఏడాది వేసవికి రావాల్సిన ‘స్పైడర్’ సినిమా ఎప్పుడో దసరాకు విడుదలైంది. అంత కాలం నిరీక్షణకు ఫలితం లేకపోయింది. మహేష్ అభిమానులకు ఈ సినిమా చేదు అనుభవాన్ని మిగిల్చింది. ఇప్పుడు మహేష్ తో పాటు అభిమానుల ఆశలు కూడా ‘భరత్ అను నేను’ మీదే ఉన్నాయి. హ్యాట్రిక్ బ్లాక్ బస్టర్లు ఇచ్చిన కొరటాల శివ ఈ చిత్రానికి దర్శకత్వం వహిస్తుండటం.. పైగా కొరటాల-మహేష్ కాంబినేషన్లో వచ్చిన ‘శ్రీమంతుడు’ ఇండస్ట్రీ హిట్ కావడంతో ‘భరత్ అను నేను’ మీద భరోసాతో ఉన్నారు ఫ్యాన్స్.

ఈ చిత్రం ఏప్రిల్లో విడుదలయ్యే అవకాశముంది. ‘స్పైడర్’కు నాన్చినట్లుగా నాన్చకుండా ఈ సినిమాకు సంబంధించిన విశేషాల్ని అభిమానులతో ముందే పంచుకోవాలని మహేష్ భావిస్తున్నట్లు సమాచారం. అందుకే సినిమా విడుదలకు నాలుగు నెలల ముందే ‘భరత్ అను నేను’ ఫస్ట్ లుక్ లాంచ్ చేయడానికి సన్నాహాలు జరుగుతున్నట్లు తెలుస్తోంది.

నూతన సంవత్సరాది కానుకగా ‘భరత్ అను నేను’ ఫస్ట్ లుక్ లాంచ్ అవుతుందట. డిసెంబరు 31 రాత్రికే సోషల్ మీడియాలో ఈ లుక్ ను పరిచయం చేస్తారని.. మరుసటి రోజు పత్రికా ప్రకటనలు కూడా ఇస్తారని సమాచారం. ఇది మహేష్ అభిమానులకు మహాదానందాన్నిచ్చే విషయమే. డీవీవీ దానయ్య నిర్మిస్తున్ను ఈ చిత్రంలో బాలీవుడ్ భామ కియారా అద్వానీ కథానాయికగా నటిస్తోంది. మహేష్ ఇందులో ఎన్నారై టర్న్డ్ పొలిటీషియన్ క్యారెక్టర్ చేస్తున్నట్లు సమాచారం.