చిరు వచ్చిన రోజే మహేష్..

తెలుగు సినిమాలకు సంక్రాంతి కంటే బెటర్ సీజన్ ఇంకోటి ఉండదంటే అతిశయోక్తి లేదు. ఈ సంక్రాంతికి ఖైదీ నెంబర్ 150.. గౌతమీపుత్ర శాతకర్ణి లాంటి భారీ చిత్రాలతో పాటు ‘శతమానం భవతి’ లాంటి మీడియం రేంజి సినిమా కూడా రిలీజైంది. ఆ మూడూ కూడా అంచనాల్ని మించి పెర్ఫామ్ చేశాయి. భారీ వసూళ్లు సాధించాయి. పోయినేడాది కూడా నాలుగు సినిమాలు రిలీజైతే నాలిగింటికీ మంచి కలెక్షన్లే వచ్చాయి. అందుకే తన కొత్త సినిమా ‘భరత్ అను నేను’ను వచ్చే ఏడాది సంక్రాంతికి ఫిక్స్ చేసుకున్నాడు సూపర్ స్టార్ మహేష్ బాబు. ఇంకా సెట్స్ మీదికే వెళ్లని ఈ చిత్రానికి అప్పుడే రిలీజ్ డేట్ ఖాయం చేశారు. మహేష్ తో సంప్రదించి.. వచ్చే ఏడాది జనవరి 11ను రిలీజ్ డేట్ గా ఖరారు చేశాడు నిర్మాత డీవీవీ దానయ్య.

ఈ ఏడాది చిరు సినిమా ‘ఖైదీ నెంబర్ 150’ రిలీజైంది జనవరి 11నే. సంక్రాంతి సీజన్లో ముందుగా రిలీజైంది ఆ సినిమానే. ముందు రావడం ఆ సినిమాకు బాగా కలిసొచ్చింది. అంచనాల్ని మించి వసూళ్లు సాధించింది. వచ్చే సంక్రాంతికి ఇంకా ఒకటో రెండో భారీ సినిమాలు రాకపోవు. ఐతే వాటి కంటే ముందు తమ సినిమాను తెచ్చి అడ్వాంటేజ్ పొందాలని మహేష్ సినిమా టీం ఫిక్సయింది. కొరటాల శివ దర్శకత్వంలో రూపొందనున్న ఈ చిత్రంలో మరికొన్ని రోజుల్లోనే సెట్స్ మీదికి వెళ్లనుంది. ‘ధోని’ సినిమాతో మంచి పేరు సంపాదించిన కియారా అద్వానీ ఈ సినిమాలో మహేష్ సరసన నటించనుంది. మహేష్ లేటెస్ట్ మూవీ ‘స్పైడర్’ ఆగస్టు 11న రిలీజవనుండగా.. ఇంకో ఐదు నెలలకే మరో సినిమాను ప్రేక్షకుల్ని పలకరించనున్నాడన్నమాట.