క్రేజీ కాంబోలో సినిమా ఉన్నట్టా లేనట్టా...?

సూపర్ స్టార్ మహేష్ బాబు - త్రివిక్ర‌మ్ శ్రీనివాస్ కాంబినేషన్ లో సినిమా రాబోతున్నట్లు ఆ మధ్య వార్తలు వచ్చిన సంగతి తెలిసిందే. గతంలో వీరి కాంబోలో వచ్చిన 'అతడు' సినిమా సక్సెస్ సాధించగా.. 'ఖలేజా' ప్లాప్ అయింది. అయినప్పటికీ త్రివిక్రమ్ 'ఖలేజా' సినిమాతో మహేష్ లోని మరో కోణాన్ని ఆవిష్కరించాడు. అందుకే మళ్ళీ వీళ్ళిద్దరూ కలిసి మరో సినిమా చేయాలని అభిమానులు కోరుకుంటున్నారు. ఈ నేపథ్యంలో ఇటీవల 'ఖలేజా' సినిమా పదేళ్లు పూర్తయినా సందర్భంగా మహేష్ ట్వీట్ చేస్తూ అతి త్వరలో త్రివిక్ర‌మ్ తో ఓ సినిమా చేయనున్నట్లు వెల్లడించాడు. దీంతో అభిమానులు వీరి కాంబోలో హ్యాట్రిక్ మూవీ రానుందని ఖుషీ అయ్యారు. మహేష్ - త్రివిక్రమ్ కలయికలో రానున్న సినిమా ఓ మల్టీస్టారర్ అని ప్రచారం కూడా జరిగింది.

అయితే ఈరోజు త్రివిక్రమ్ బర్త్ డే సందర్భంగా మహేష్ పెట్టిన ట్వీట్ తో ఈ సినిమా ఇప్పట్లో ఉంటుందా అని ఫ్యాన్స్ డౌట్ వ్యక్తం చేస్తున్నారు. త్రివిక్రమ్ పుట్టినరోజు సందర్భంగా మహేష్ బాబు ట్విట్టర్ వేదికగా విషెష్ తెలియజేసారు. అయితే ఈ ట్వీట్ లో తమ ప్రాజెక్ట్ గురించి మెన్షన్ చేయకపోవడంతో అభిమానుల్లో డౌట్స్ మొదలయ్యాయి. ఇప్పటికే క్రేజీ కాంబోలో సినిమా సెట్ అయినప్పటికీ జస్ట్ విషెష్ చెప్పి ఆ ప్రాజెక్ట్ గురించి చెప్పకపోవడంతో వీరి కాంబోలో సినిమా ఉన్నట్టా లేనట్టా అని కామెంట్స్ చేస్తున్నారు. కాగా, మహేష్ బాబు ప్రస్తుతం 'సర్కారు వారి పాట' సినిమా స్టార్ట్ చేయడానికి సన్నాహకాలు చేస్తున్నారు. మరోవైపు త్రివిక్రమ్ ఎన్టీఆర్ తో సినిమా కంటే ముందే రామ్ తో ఓ సినిమా చేస్తాడని వార్తలు వస్తున్నాయి.