25వ తారీఖు మహేష్ బాబు ఎక్కడుంటాడు?

మహేష్ బాబు ఓ సినిమా ఆడియో ఫంక్షన్ కు ముఖ్య అతిథిగా వచ్చాడంటే.. ఆ సినిమాకు ఆటోమేటిగ్గా క్రేజ్ వచ్చేస్తుంది. ఐతే మహేష్ అలా వేరే వాళ్ల ఫంక్షన్ కు రావడం చాలా అరుదు. ఆ మధ్య ‘అఖిల్’ ఆడియో ఫంక్షన్ కు వస్తే అందరూ ఆశ్చర్యపోయారు. ఐతే బయటి వాళ్లకు ఎంత దూరంగా ఉన్నా బావ సుధీర్ బాబును మాత్రం ప్రమోట్ చేయక తప్పదు. అందుకే అతడి సినిమాల ఆడియో ఫంక్షన్ లకో - ఇంకేదైనా కార్యక్రమానికో తప్పకుండా వస్తుంటాడు మహేష్. సుధీర్ కొత్త సినిమా ‘భలే మంచి రోజు’ను కూడా ప్రమోట్ చేయడానికి సూపర్ స్టార్ నడుం బిగిస్తున్నాడు.

ఈ సినిమా ఆడియో ఫంక్షన్ ఈ నెల 25న హైదరాబాద్ లో జరగబోతోంది. మహేష్ బాబే ముఖ్య అతిథి. ఇప్పటికే టీజర్ తో జనాల్లో బాగానే ఆసక్తి రేపింది ‘భలే మంచి రోజు’ టీమ్. ఆ టీజర్ గురించి టాలీవుడ్ లోని చాలామంది ప్రముఖులతో మాట్లాడించి.. జనాలకు మరింత చేరువ చేశాడు సుధీర్. ఇప్పుడు మహేష్ వచ్చి ఆడియో రిలీజ్ చేశాడంటే సినిమాకు మరింత క్రేజ్ వస్తుంది. సుధీర్ - వామిఖ జంటగా నటించిన ఈ సినిమాలో సాయికుమార్ ముఖ్య పాత్ర పోషించాడు. ఇంతకుముందు కొన్ని షార్ట్ ఫిలిమ్స్ తీసిన శ్రీరామ్ ఆదిత్య ఈ చిత్రంతో దర్శకుడిగా పరిచయమవుతున్నాడు. ఈ సినిమా నిర్మాతలు ప్రభాస్ కు స్నేహితులు కావడంతో అతను కూడా సినిమాను ప్రమోట్ చేయడానికి హామీ ఇచ్చాడట.