రెండు సినిమాల గురించి మహేశ్ ఏమన్నాడంటే..

టాలీవుడ్ అగ్ర కథానాయకుల్లో ఒకరైన మహేశ్ బాబు తీరు కాస్త భిన్నం. పని.. ఫ్యామిలీ అన్నట్లుగా వ్యవహరించే మహేశ్ గురించి ముచ్చట్లు పెద్దగా బయటకు రావు. అందుకు తగ్గట్లే ఆయన ఆచితూచి వ్యవహరిస్తుంటారు. సోషల్ మీడియాలో చురుగ్గా ఉన్నప్పటికీ.. సినిమాల గురించి కంటే తన పర్సనల్ విషయాల్ని.. ఫోటోలకు సంబంధించిన సమాచారాన్నిఅప్పుడప్పడు పోస్ట్ చేస్తుంటారు.

అంతే తప్ప.. మిగిలిన సినిమాల గురించి ఆయన పెద్దగా ప్రస్తావించారు. అలాంటి మహేశ్.. సంక్రాంతికి విడుదలైన రెండు అగ్ర చిత్రాల గురించి స్పందించారు. పండుగ బరిలో దిగిన ఖైదీ.. శాతకర్ణి మూవీలపై వరుస ట్వీట్లు పోస్ట్ చేయటం విశేషం. రెండు సినిమాల సక్సస్ మీద సంతోషాన్ని వ్యక్తం చేసిన ఆయన.. రెండు టీంలను ప్రత్యేకంగా అభినందించారు.

బిగ్ మూవీలతో టాలీవుడ్ లో సంక్రాంతి సంబరాల వర్షం కురుస్తోందన్న మహేశ్.. ఏళ్ల తర్వాత రీఎంట్రీ ఇచ్చిన మెగాస్టార్ కు వెల్ కం చెప్పే క్రమంలో.. ‘‘మిమ్మల్ని మిస్ అయ్యాం. వెల్ కం బ్యాక్’’ అని చెప్పటమేకాదు.. చిరు లుక్స్ అద్భుతమని.. ఆయన మేజిక్ ను పొగిడేశారు.

చిరును ఇంతలా పొగిడేసినప్పుడు సంక్రాంతి బరిలో నిలిచిన శాతకర్ణి బాలయ్యను పొగడకుండా ఉంటారా? ఆయన్నుకూడా పొగిడేశారు. ‘‘మీ విజన్ కు.. కన్విక్షన్ కు హ్యాట్స్ ఆఫ్’’ అని చెప్పటమేకాదు.. టాలీవుడ్ లో ఆయన తాజా ప్రదర్శన ఉత్తమమైన వాటిల్లో ఒకటిగా నిలుస్తుందని భారీ పొగడ్తనే కట్టబెట్టారు. ఏమైనా.. రెండు అగ్ర సినిమాల గురించి రియాక్ట్ అయిన మహేశ్.. శతమానంభవతి గురించి ఎందుకు మాట్లాడలేదబ్బా?