ఎన్టీఆర్ కు ఇది ఉత్తమ నివాళి అన్న మహేష్ బాబు

సూపర్ స్టార్ మహేష్ బాబు తన సినిమాల విషయంలోనే కాకుండా ఇతర సినిమాల విషయంలో కూడా సోషల్ మీడియా ద్వారా స్పందన తెలియజేస్తూ ఉంటాడు. మహేష్ కు ఏ సినిమా అయినా నచ్చితే తన సోషల్ మీడియా ఖాతా ద్వారా ఆ విషయాన్ని అభిమానులతో పంచుకుంటాడు. తాజాగా 'ఎన్టీఆర్ కథానాయకుడు' సినిమాపై ప్రశంసల వర్షం కురిపించాడు.

'ఎన్టీఆర్ కథానాయకుడు' బుధవారం నాడు ప్రేక్షకుల ముందుకు వచ్చిన సంగతి తెలిసిందే. ఈ సినిమా చూసిన వెంటనే మహేష్ తన ట్విట్టర్ ఖాతా ద్వారా వరుస ట్వీట్లతో తన స్పందనను తెలిపాడు. సినిమా అద్భుతమని.. డైరెక్టర్ క్రిష్ ప్రేక్షకులకు మధురానుభూతి కలిగించేలా క్యాన్వాస్ పై పెయింటింగ్ లా వేశాడని అన్నాడు. బాలకృష్ణ గారు ఎన్టీఆర్ గారి పాత్రలో జీవించారని.. ప్రతి ఫ్రేమ్ లో ఆవిషయం తెలుస్తుందని అన్నాడు. అన్ని పాత్రలు చక్కగా డిజైన్ చేశారని .. 100 % న్యాయం చేసేలా ఆయా నటులు పోషించారని.. అందరినీ బ్రిలియంట్ అంటూ మెచ్చుకున్నాడు.

తెలుగు సినిమాకు లెజెండ్ అయిన ఎన్టీ రామారావు గారికి #ఎన్టీఆర్ కథానాయకుడు ఒక ఉత్తమ నివాళి అన్నాడు. ఇక 'ఎన్టీఆర్ కథానాయకుడు' కంటే బెటర్ గా ఏదైనా ఉంటుందంటే.. అది 'ఎన్టీఆర్ మహానాయకుడు' అని.. ఆ చిత్రం కోసం వేచి చూస్తున్నానని తెలిపాడు. ఎన్టీఆర్ బయోపిక్ టీమ్ మెంబర్స్ అందరికీ అభినందనలు తెలిపాడు.

మహేష్ బాబు అభినందనలు స్పందించిన దర్శకుడు క్రిష్.. "థ్యాంక్ యూ మహేష్ గారు.. మీ ప్రశంసలు మా టీం అందరికీ చాలా విలువైనవి. థ్యాంక్ యూ సో మచ్" అంటూ కృతజ్ఞతలు తెలిపాడు.