మహేష్ ఎంట్రీతో దిమ్మ తిరిగింది

మహేష్ బాబు మనకు సూపర్ స్టారే. మరి తమిళనాడుకు వెళ్తే అతను మామూలు హీరోనే కదా అనుకున్నారంతా. కానీ నిన్న రాత్రి చెన్నైలో జరిగిన ‘స్పైడర్’ ఆడియో వేడుక సందర్భంగా మహేష్ బాబుకు ఉన్న క్రేజ్ చూసి కోలీవుడ్ జనాలకు మతిపోయింది. మన హీరోలు చెన్నైకి వెళ్తే ఆ సిటీలో ఉండే తెలుగు అభిమానులు వచ్చి హంగామా చేయడం మామూలే. కానీ మహేష్ ఉన్నది చెన్నైలోనా హైదరాబాద్ లోనా అనిపించే స్థాయిలో రచ్చ జరిగింది ఈ వేడుకలో. మామూలుగా శిల్ప కళా వేదికలో మన స్టార్ హీరోల ఆడియో వేడుకలు జరిగితే అభిమానులు ఏ స్థాయిలో సందడి చేస్తారో.. చెన్నైలోనూ అదే పరిస్థితి కనిపించింది.

ఆడియో వేడుక ఆరంభం కావడానికి ముందు నుంచి ఆడిటోరియంలో హంగామా మొదలైంది. ఇక మహేష్ వచ్చే సమయానికైతే రచ్చ మామూలుగా లేదు. అతను లోపలికి రాగానే ఆడిటోరియం హోరెత్తిపోయింది. మహేష్ చార్మ్ గురించి.. అతడి నటన గురించి తమిళ పరిశ్రమకు చెందిన ప్రముఖులు ఒక్కొక్కరుగా పొగుడుతుంటే అభిమానులు ఆనందం పట్టలేకపోయారు. అతిథుల మాటలు వినిపించని స్థాయిలో ఆడిటోరియం హోరెత్తింది. మురుగదాస్ మాట్లాడుతున్నపుడైతే అభిమానులు మరింత హంగామా చేశారు. మధ్యలో మురుగ ప్రసంగం ఆపి.. సైలెంటుగా ఉండమని.. ఈ వేదిక మీద మాట్లాడటానికి తాను రెండేళ్లుగా ఎదురు చూస్తున్నానని అభిమానుల్ని వేడుకోవాల్సి వచ్చింది. ఇక మహేష్ తమిళంలో మాట్లాడుతూ.. తనదైన శైలిలో పంచులు పేలుస్తుంటే.. అభిమానుల గురించి మాట్లాడుతుంటే.. ఇక ఫ్యాన్స్ రచ్చ గురించి చెప్పేదేముంది? మొత్తానికి ‘స్పైడర్’ ఈవెంట్ కవర్ చేయడానికి వచ్చిన తమిళ మీడియా.. మామూలుగా తమ స్టార్ హీరోల సినిమాల వేడుకలకున్నట్లే హంగామా కనిపించే సరికి ఆశ్చర్యపోయింది.