అంత తొందరెందుకు.. మహేష్ ఫ్యాన్స్ కన్సర్న్!

మహేష్ బాబు 'మహర్షి' మరో నెలలోపే రిలీజ్ కానుంది. మహర్షి తర్వాత మహేష్ బాబు అనిల్ రావిపూడి దర్శకత్వంలో చేస్తున్నాడనే సంగతి తెలిసిందే. నిజానికి సుకుమార్ దర్శకత్వంలో మహేష్ తన నెక్స్ట్ సినిమాను చేయాల్సి ఉన్నా సడెన్ గా అనిల్ రావిపూడి సీన్లోకి ఎంటర్ అవ్వడం తెలిసిందే. దీంతో సుకుమార్ ప్రాజెక్ట్ సైడ్ అయిపోయింది. కారణాలేవైనా సుకుమార్ ప్రాజెక్ట్ క్యాన్సిల్ కావడం అభిమానులను నిరాశ పరిచేదే. సుకుమార్ ఇప్పుడు టాప్ ఫామ్ లో ఉన్నాడు.. పెద్ద స్టార్ హీరోలను డీల్ చేసిన అనుభవం కూడా ఉంది. 'రంగస్థలం' తో నాన్ బాహుబలి హిట్ ఇచ్చిన సుకుమార్ ను కాదని అనిల్ రావిపూడిని మహేష్ బాబు ఎంచుకోవడం సరైన నిర్ణయం కాదేమోనని ఇండస్ట్రీ లో ఇప్పటికే ఒక టాక్ ఉంది.

అనిల్ రావిపూడి మీడియం రేంజి హీరోలతోనే ఇప్పటివరకూ సినిమాలు చేశాడు. మహేష్ లాంటి స్టార్ తో చేయడం అనిల్ కు ఇదే మొదటి సారి. 'F2' సినిమా బ్లాక్ బస్టర్ గా నిలిచినప్పటికీ స్క్రిప్ట్ పరంగా ఆ సినిమా సెకండ్ హాఫ్ వీక్ అనే సంగతి తెలిసిందే. సంక్రాంతి సీజన్లో ఇతర సినిమాలు ఫ్లాప్ కావడం.. వెంకీ కామెడీ వర్క్ కావడంతో సినిమా ఆ రేంజ్ విజయాన్ని నమోదు చేసింది. 'బ్రహ్మోత్సవం'.. 'స్పైడర్' లాంటి డిజాస్టర్ల తర్వాత మహేష్ తన సినిమాల ఎంపికలో జాగ్రత్త వహిస్తున్నాడు. బౌండ్ స్క్రిప్ట్ ఉంటే కానీ సినిమాకు గ్రీన్ సిగ్నల్ ఇవ్వడం లేదని అంటారు. కానీ అనిల్ రావిపూడి కూడా అక్కడికక్కడే స్క్రిప్ట్ డెవెలప్ చేసే టైపే అని... బౌండ్ స్క్రిప్ట్ తో వెళ్ళే దర్శకుడు కాదనే టాక్ ఉంది. మరి అనిల్ కు ఎలా గ్రీన్ సిగ్నల్ ఇచ్చాడ నేది కొందరికి డౌట్.

మహేష్ ఒక సినిమా చేయాలంటే దాదాపు ఏడాది.. ఏడాదిన్నర పడుతుంది. స్క్రిప్ట్ వర్క్ టైం కలిపితే రెండేళ్ళు. 'మహర్షి' సినిమా కోసం దర్శకుడు వంశీ పైడిపల్లి రెండేళ్ళు తీసుకున్నాడు. కానీ #మహేష్ 26 ను ఆరు నెలల్లోనే పూర్తి చేసి నెక్స్ట్ సంక్రాంతి బరిలో దించాలనే ఆలోచన ఉన్నట్టుగా చెప్తున్నారు. అనిల్ రావిపూడి రేమ్యూనరేషన్ కూడా 9 కోట్లవరకూ ఇస్తున్నారట. టైమ్ డెడ్ లైన్ పెట్టి.. ఇలా భారీ రెమ్యూనేరేషన్ ఇస్తే.. సినిమాను వీలైనంత త్వరగా చుట్టేసే అవకాశం లేకపోలేదనే టాక్ వినిపిస్తోంది. తన కెరీర్లో డిజాస్టర్ల లేకుండా చూసుకోవాలని జాగ్రత్త పడుతున్న మహేష్ బాబు ఈ ప్రాజెక్ట్ విషయంలో తొందరపడుతున్నాడేమో అని కొందరు ఫ్యాన్స్ ఆందోళనగా ఉన్నారు. లేట్ అయినా సరే.. కాస్త జాగ్రత్తగా మంచి సినిమాతో రావాలని.. సక్సెస్ సాధించాలని ఫ్యాన్స్ కోరుకుంటున్నారు.