24 కోసం సూర్యను రెఫర్ చేయలేదు-మహేష్

అయ్యో మహేష్ ‘24’ సినిమాను మిస్సయిపోయాడే అని కొందరు అభిమానులు తెగ ఫీలైపోతున్నారు. ఐతే మహేష్ మాత్రం ఆ సినిమాను మిస్సవడంలో ఏమాత్రం రిగ్రెట్స్ లేవన్నట్లు మాట్లాడుతున్నాడు. ఆ సినిమా సరైన నటుడి దగ్గరికే చేరిందని మహేష్ అన్నాడు. తాను 24 సినిమా చూసినట్లు కూడా మహేష్ వెల్లడించాడు. తనే ‘24’ కథను సూర్యకు చెప్పమని విక్రమ్ కుమార్‌ కు చెప్పమన్నట్లు వచ్చిన వార్తల్ని అతను ఖండించాడు.

‘‘24 కథ నాకు చాలా బాగా నచ్చింది. కానీ కథ వింటున్నపుడు ఆ పాత్రల్లో నన్ను నేను తెర మీద చూసుకోలేకపోయాను. అందుకే నాకది సరిపోదనిపించి వద్దనుకున్నాను. ఐతే నేనేమీ సూర్య గారిని రెఫర్ చేయలేదు. కొన్ని కథలు సరైన వ్యక్తుల దగ్గరికే వెళ్లాయి. అలాగే 24 కథ సూర్య దగ్గరికెళ్లింది. ఈ మధ్యే 24 మూవీ చూశాను. అద్భుతంగా ఉంది. సూర్య చాలా బాగా చేశారు’’ అని ‘24’ విషయంలో తన అభిప్రాయాల గురించి జనాలకున్న సందేహాలన్నీ తీర్చేశాడు మహేష్.

ఇక మారుతున్న ప్రేక్షకుల అభిరుచి గురించి.. తెలుగులో వస్తున్న ప్రయోగాత్మక చిత్రాల గురించి మహేష్ స్పందిస్తూ.. ‘‘మన ప్రేక్షకులు కొత్తదనం ఉన్న కథల కోసం వెదుకుతున్నారు. అవి అందిస్తే సరిపోతుంది. అలాగని మరీ బుర్రకి పదును పెట్టేంత ప్రయోగాల్నేం కోరుకోవడం లేదు. ప్రయోగం పేరుతో గందరగోళానికి గురిచేస్తే తిరస్కారానికి గురికాక తప్పదు. ప్రయోగానికీ.. రొటీన్‌ సినిమాలకీ మధ్య ఓ చిన్న గీత ఉంటుంది. అది గమనించి వెళ్లాలి. ‘బాహుబలి’ సినిమా ఓ కొత్త ఆలోచన. ‘శ్రీమంతుడు’ కమర్షియల్‌ ఫార్మాట్‌ కథని కొత్తగా చెప్పిన చిత్రం. తెలుగు ప్రేక్షకులు ఇలాంటివే కోరుకొంటున్నారు’’ అని మహేష్ అన్నాడు.