ఐతే మహేష్ చేస్తున్నట్లేనా?

సూపర్ స్టార్ కృష్ణ హీరోగా పీక్ లో ఉన్న టైంలో ఆయన సినిమాల్లో బాలనటుడిగా నటించాడు మహేష్ బాబు. ఐతే మహేష్ హీరో అయ్యాక కృష్ణ సినిమాల్లో ఒక్కసారి కూడా నటించలేదు. మహేష్ హీరో అయ్యే సమయానికి కృష్ణ సినిమాలు కూడా బాగా తగ్గించేయడం కూడా దీనికి కారణం కావచ్చు. మహేష్ సినిమా ‘వంశీ’లో కృష్ణ ఓ పాత్ర చేశారు తప్పితే.. కృష్ణ సినిమాల్లో మహేష్ కనిపించలేదు. ఐతే ఎట్టకేలకు మహేష్ మళ్లీ కృష్ణ సినిమాలో కనిపించబోతున్నట్లు సమాచారం.

కృష్ణ లాంగ్ గ్యాప్ తర్వాత హీరో క్యారెక్టర్ చేస్తున్న ‘శ్రీ శ్రీ’ సినిమాలో మహేష్ క్యామియో రోల్ చేయబోతున్నట్లు సమాచారం. ఇందులో మహేష్ తనయుడు గౌతమ్ కృష్ణ కూడా కనిపించే అవకాశముందని.. ఇది ఒకరకంగా ఘట్టమనేని ఫ్యామిలీ ‘మనం’ అని చెప్పుకోవచ్చని ఇండస్ట్రీలో చర్చ జరుగుతోంది. మహేష్ ‘శ్రీ శ్రీ’లో నటిస్తాడని ఇంతకుముందే వార్తలొచ్చినప్పటికీ ఇప్పుడే ఆ చిత్ర యూనిట్ నుంచి కూడా కన్ఫర్మేషన్ వచ్చినట్లు తెలుస్తోంది.

ఈ సినిమాకు మహేష్ వాయిస్ ఓవర్ కూడా ఇస్తున్నట్లు చెబుతున్నారు. ముందు క్యామియో రోల్ చేయడానికి మహేష్ అంత ఆసక్తి చూపకపోయినప్పటికీ.. సినిమా ఔట్ పుట్ చూశాక మనసు మార్చుకున్నాడట. నిజంగా మహేష్ నటిస్తున్నట్లయితే.. ఆ విషయాన్ని దాచడం వల్ల అయితే ప్రయోజనం ఉండదు. కాబట్టి త్వరలోనే ఈ సంగతి యూనిట్ సభ్యులే స్వయంగా వెల్లడించే అవకాశముంది.