మహేష్ బాబు.. 50 లక్షలు సంపాదించాడు

ఒక్కో సినిమాకు 20-25 కోట్ల దాకా పారితోషకం అందుకుంటూ 50 లక్షలు సంపాదించాడమేంటి అంటారా..? ఇది డబ్బుల లెక్క కాదులెండి. మనుషుల లెక్కే. ట్విట్టర్లో మహేష్ బాబు ఫాలోవర్ల సంఖ్య ఇది. తెలుగులో మరే హీరోకూ సాధ్యం కాని రీతిలో ట్విట్టర్లో 5 మిలియన్ మార్కును అందుకున్నాడు మహేష్. నిన్ననే మహేష్ ఈ ఘనత సాధించాడు. దక్షిణాది తారల్లో ఇప్పటిదాకా 5 మిలియన్ మార్కును దాటింది ఇద్దరే కావడం విశేషం. తమిళ స్టార్ హీరో ధనుష్ ప్రస్తుతం 6.4 మిలియన్ల ఫాలోవర్లతో దూసుకెళ్తున్నాడు. మన సమంత 5.71 మిలియన్ ఫాలోవర్లతో ఉంది.

ఇక తెలుగు హీరోల్లో మహేష్ తర్వాతి స్థానం సీనియర్ హీరో అక్కినేని నాగార్జునదే కావడం విశేషం. ఆయన 4.5 మిలియన్ ఫాలోవర్లతో కొనసాగుతున్నాడు. దగ్గుబాటి రానా నాగార్జునకు అత్యంత చేరువగా ఉన్నాడు. అతడి వెనుక 4.48 మిలియన్ ఫాలోవర్లున్నారు. కొంచెం లేటుగా ట్విట్టర్లోకి వచ్చి కేవలం పొలిటికల్.. సామాజిక అంశాల మీద మాత్రమే ట్వీట్లు పెడుతున్న పవన్ కళ్యాణ్ ను ట్విట్టర్లో 22 లక్షల మంది అనుసరిస్తున్నారు. రాజమౌళి 3.75 మిలియన్ ఫాలోవర్లతో కొనసాగుతున్నాడు. రెండేళ్ల కిందట ట్విట్టర్లోకి ఎంట్రీ ఇచ్చిన అల్లు అర్జున్ వెనుక 17 లక్షల మంది ఉన్నారు. సూపర్ స్టార్ రజినీకాంత్.. తమిళ స్టార్ హీరోయిన్ త్రిష సమానంగా 4.4 మిలియన్ ఫాలోవర్లతో ఉన్నారు. సూర్య కూడా 4 మిలియన్ మార్కుకు చేరువగా ఉన్నాడు.