మహేష్ స్వయంగా చెక్ చేసాడు

భరత్ అనే నేను షూటింగ్ జెట్ స్పీడ్ తో సాగుతోంది. రిలీజ్ డేట్ ఇంకా పక్కగా ఖరారు చేయనప్పటికీ ఏప్రిల్ మొదటివారానికంతా ఫినిష్ చేయాలనే టార్గెట్ తో టీం మొత్తం కష్టపడుతోంది. ఇటీవలే పబ్లిక్ మీటింగ్ నేపధ్యంలో కీలకమైన క్లైమాక్స్ షూట్ చేసిన దర్శకుడు కొరటాల శివ బాలన్స్ టాకీ పార్ట్ తో పాటు పాటల చిత్రీకరణ కూడా ప్లాన్ చేస్తున్నాడు. పొలిటికల్ బ్యాక్ డ్రాప్ లో మహేష్ బాబు మొదటిసారి నటిస్తున్న సినిమా కావడంతో అంచనాలు ఆకాశాన్ని తాకుతున్నాయి. బ్రహ్మోత్సవం, స్పైడర్ ఫలితాల ఎఫెక్ట్ ఏ మాత్రం లేకుండా బ్రహ్మాండమైన బిజినెస్ జరుగుతోంది. ఇక ఇందులో మొదటిసారి తెలుగు సినిమాతో పరిచయమవుతున్న బాలీవుడ్ బ్యూటీ కైరా అద్వాని ఎగ్జైట్మెంట్ మామూలుగా లేదు. ఫస్ట్ ఛాన్స్ ఏకంగా ప్రిన్స్ తోనే రావడం అమ్మడిని భూమి మీద నీలవనీయడం లేదు.

షూటింగ్ స్పాట్ లో విశేషాలను ఒక మీడియా ఛానల్ ఇంటర్వ్యూలో పంచుకున్న కైరా అద్వాని మహేష్ బాబు గురించి చాలా స్పెషల్ గా చెప్పడం ఫాన్స్ కు హాట్ టాపిక్ గా మారింది. తనకు తారసపడిన హీరోల్లో మహేష్ బాబునే బెస్ట్ అని చెప్పిన కైరా సినిమాకు సంబంధించి ప్రతి విషయంలో అతను తీసుకునే శ్రద్ధ తనను కట్టిపడేసిందని చెప్పింది. తన కాంబో సీన్స్ లేని వాటిని కూడా మానిటర్ లో చెక్ చేసి దర్శకుడు శివ కోరుతున్న రీతిలో తాను పెర్ఫార్మన్స్ ఇస్తున్నానా లేదా అని చెక్ చేసి తనకు విలువలైన సలహాలు సూచనలు ఇచ్చేవాడట. మొదటిసారి ఒక టీం మొత్తం ఒకే రకమైన కసితో పనిచేయటం భరత్ అను నేనులోనే చూశానన్న కైరా ఈ మాటలతో అంచనాలు ఇంకాస్త పెంచేసింది.

విడుదల తేది గురించి త్వరలోనే క్లారిటీ రానున్న భరత్ అనే నేను టీజర్ - ట్రైలర్ కోసం అభిమానులు కళ్ళల్లో ఒత్తులు వేసుకుని ఎదురు చూస్తున్నారు. శరత్ కుమార్ మహేష్ బాబు తండ్రిగా నటిస్తుండగా అపోజిషన్ లీడర్ గా ప్రకాష్ రాజ్ పాత్ర చాలా ప్రత్యేకంగా ఉంటుందని టాక్. దేవి శ్రీ ప్రసాద్ ట్యూన్స్ ఇస్తున్న ఈ మూవీ ఎప్పుడెప్పుడు విడుదల అవుతుందా అని కైరా అద్వానికి కూడా చాలా ఉత్సుకతగా ఉంది. మొదటి సినిమా పూర్తవ్వక ముందే రామ్ చరణ్ తో రెండో ఛాన్స్ కొట్టేసిన కైరా ఆనందానికి పగ్గాలు వేయటం ఎవరి వల్ల కావడం లేదు.