మహేషే ఎపిసోడ్ కేక పుట్టించేట్లుందే..

ఇన్నేళ్ల కెరీర్లో మహేష్ బాబు ఎప్పుడూ బుల్లితెరలో కనిపించింది లేదు. ఏదైనా అవార్డుల కోసం రావడమో.. ఇంటర్వ్యూలు ఇవ్వడమో తప్ప.. ఏ టీవీ కార్యక్రమంలోనూ దర్శనమివ్వలేదు మహేష్. ఐతే తొలిసారి ప్రిన్స్ ఓ టీవీ టాక్ షోలో కనిపించబోతున్నాడు. ఈనెల 22న ఆదివారం రాత్రి జీ తెలుగులో యాంకర్ ప్రదీప్ నిర్వహించే ‘కొంచెం టచ్ లో ఉంటే చెబుతాను’ టాక్ షోకు మహేష్ అతిథిగా రాబోతున్నాడు. ఈ ఎపిసోడ్ కు సంబంధించి ప్రత్యేకంగా టీజర్ కూడా రెడీ చేయడం విశేషం. ఆ టీజర్ చూస్తే మహేష్ అభిమానులు.. ఈ ఆదివారం వేరే కమిట్మెంట్లేమీ పెట్టుకోకుండా టీవీలకు అతుక్కుపోయేట్లే ఉంది.

ఎప్పుడైనా గరిట తిప్పారా అంటే.. ‘‘నాకే కాదు మా ఆవిడకు కూడా ఎప్పుడూ ఆ అలవాటు లేదు. అదే హైలైట్’’ అనడం.. కొడుకు గౌతమ్ తనకు విషెస్ చెప్పిన వీడియో ప్లే చేయగానే.. ‘‘ఇదెప్పుడు చేశారండీ బాబూ’’ అంటూ సిగ్గుపడటం.. తమన్నా ఇంతకుముందు పాల్గొన్న షోలో తన వాయిస్ ఇమిటేట్ చేస్తూ ‘‘తమన్నాను ఇష్టపడని వాళ్లు ఈ భూమ్మీద ఉండాల్సిన అవసరం లేదు. అలాంటోళ్ల వల్ల ఏ ఉపయోగం లేదు’’ అన్న ‘బిజినెస్ మేన్’ డైలాగ్ వినిపించినపుడు ముసి ముసి నవ్వులు నవ్వడం.. చిన్నపుడు దేవి థియేటర్లో టికెట్ల కోసం క్యూలో చాలాసార్లు నిలబడ్డానని చెప్పడం.. ఎపిసోడ్ ఆఖర్లో ‘‘నువ్వు సినిమాలు చేయొద్దమ్మా.. నీకీ షోయే కరెక్ట్’’ అంటూ ప్రదీప్ కు పంచ్ వేయడం.. ఇలా చాలా విశేషాలే ఉన్నాయి ఈ ఎపిసోడ్లో. ఈ టీజర్ చూశాక మహేష్ ఫ్యాన్స్ ఇంకో ఆరు రోజులు ఆగడమంటే కష్టమే.