మైండు బ్లాక్ పాటకు మహేష్ లుంగీ డ్యాన్స్

సూపర్ స్టార్ మహేష్ బాబు తాజా చిత్రం 'సరిలేరు నీకెవ్వరు' సంక్రాంతి పండుగ సందర్భంగా విడుదలకు సిద్ధమవుతోంది. వచ్చే నెలలో రిలీజ్ డేట్ ఉంది కాబట్టి ప్రమోషన్స్ ఊపందుకుంటున్నాయి. ఇప్పటికే 'సరిలేరు నీకెవ్వరు' టీజర్ కు భారీ రెస్పాన్స్ దక్కింది. నిన్న 'సరిలేరు నీకెవ్వరు' నుండి 'మైండ్ బ్లాక్' అంటూ సాగే మొదటి లిరికల్ సాంగ్ రిలీజ్ చేస్తే డీసెంట్ రెస్పాన్స్ దక్కించుకుంది.

దేవీ శ్రీ ప్రసాద్ స్టైల్ లో ఉన్న ఈ పాటకు దర్శకుడు అనిల్ రావిపూడి ఫుల్ మాస్ టచ్ ఇస్తున్నాడట. సినిమాలో ఇది చివరిపాటగా ఉంటుందని అందుకే మహేష్ - రష్మికలపై ఫుల్ మాస్ స్టెప్స్ ఉండేలా చిత్రకరణ జరిపారని సమాచారం. ఈ పాటలో మహేష్ బాబు లుంగీ డ్యాన్స్ వేస్తాడట. మహేష్ బాబు బాడీ లాంగ్వేజ్ కు తగ్గట్టు శేఖర్ మాస్టర్ సరైన మాస్ స్టెప్పులు ఉండేలా కోరియోగ్రఫీ అందించారని.. మహేష్ ఫ్యాన్స్ కు ఇదో ట్రీట్ లా ఉండబోతోందని అంటున్నారు.

మహేష్ బాబు - అనిల్ రావిపూడి కాంబినేషన్లలో తెరకెక్కుతున్న తొలి చిత్రం ఇది. వరస హిట్లతో జోరుమీదున్న అనిల్ రావిపూడి ఈ సినిమాలో మహేష్ ను మాస్ హీరోగా చూపించబోతున్నానని.. బోర్ కొట్టించే రొటీన్ మెసేజులు ఉండవని హామీ ఇవ్వడంతో ప్రేక్షకులకు ఈ సినిమాపై ఆసక్తి పెరిగింది. దానికి తగ్గట్టే 'సరిలేరు నీకెవ్వరు' టీజర్ కూడా పూర్తి స్థాయి ఎంటర్టైనర్ చూడబోతున్నామని ఫీల్ కలిగించింది. వాటికి ఈ లుంగీ డ్యాన్స్ కూడా తోడైతే దిమ్మతిరిగి మైండు బ్లాంక్ కావడం ఫిక్స్ అనుకోవాలి.