ఫోటో స్టొరీ: మెస్మరైజ్ చేస్తున్న మహేష్ బాబు

సూపర్ స్టార్ మహేష్ బాబు తాజా చిత్రం 'మహర్షి' మే 9 న రిలీజ్ కానుందనే సంగతి తెలిసిందే. రిలీజ్ కు ఇక నెల రోజుల సమయం కూడా లేదు.. అందుకే 'మహర్షి' టీమ్ ప్రమోషన్స్ మొదలు పెట్టారు. ఇప్పటికే ఈ సినిమా నుంచి 'ఛోటీ ఛోటీ బాతే' .. 'నువ్వే సమస్తం' అంటూ సాగే లిరికల్ సాంగ్స్ ను విడుదల చేశారు. తాజాగా మరో సాంగ్ వీడియో ప్రివ్యూ విడుదల కు సంబంధించిన అప్డేట్ ఇచ్చారు.

'ఎవరెస్ట్ అంచున' అంటూ సాగే ఈ పాట వీడియో ప్రివ్యూను ఏప్రిల్ 19 వ తారీఖు సాయంత్రం 04:05 గంటలకు విడుదల చేస్తామని మేకర్స్ ప్రకటించారు. ఈ విషయం తెలుపుతూ మహర్షి టీమ్ సరికొత్త పోస్టర్ ను కూడా విడుదల చేసింది. పోస్టర్ లో మహేష్ బాబు రాక్ స్టార్ లాగా ఉన్నాడు. డార్క్ కలర్ చిరుగుల జీన్స్.. పొడవైన బూట్లు.. మెరుస్తూ ఉండే జాకెట్ వేసుకున్న మహేష్ పెద్ద గాగుల్స్ కూడా పెట్టుకోవడంతో యమా స్టైలిష్ గా ఉన్నాడు. పింక్ అండ్ పర్పుల్ కలర్ కాంబినేషన్ లైటింగ్ థీమ్ ఉండడంతో ఇదో చిల్ అవుట్ పార్టీ సాంగ్ గా ఉండబోతోందనిపిస్తోంది.

మహేష్ బాబు గత చిత్రం 'భరత్ అనే నేను' కు చార్ట్ బస్టర్ ఆల్బమ్ ఇచ్చిన దేవి శ్రీ ప్రసాద్ ఈ సినిమాకు కూడా సూపర్బ్ ఆల్బమ్ ఇస్తాడని అభిమానులు నమ్మకంగా ఉన్నారు. ఇప్పటివరకూ రిలీజ్ అయిన పాటలు బాగున్నాయి కానీ చార్ట్ బస్టర్స్ అనే రేంజ్ లో అయితే లేవు. మరి ఈ 'ఎవరెస్ట్ అంచున' పాట వారి అంచనాలను మించి ఉంటుందని.. సంగీత ప్రియులను అలరిస్తుందని ఆశిద్దాం.