'మహర్షి' లీక్‌... కీలక సీన్‌ రివీల్‌

మహేష్‌ బాబు 25వ చిత్రం 'మహర్షి' షూటింగ్‌ చివరి దశకు చేరుకుంది. వచ్చే నెలతో సినిమా షూటింగ్‌ పూర్తి కాబోతుంది. మహేష్‌ బాబు ఈ చిత్రంలో ఎలాంటి గెటప్‌ లో కనిపించబోతున్నాడో ఇప్పటికే రివీల్‌ అయ్యింది. మొదటి సారి గడ్డంతో ఈ చిత్రంలో మహేష్‌ బాబు కనిపించబోతున్నాడు. విదేశాల్లో పెద్ద వ్యాపార సామ్రాజ్య అధినేతగా కనిపించడంతో పాటు, స్నేహితుడి కోసం పల్లెటూరుకు వచ్చి వ్యవసాయం చేసే పాత్రలో కూడా మహేష్‌ బాబు కనిపించబోతున్నాడు. తాజాగా ఈ చిత్రం షూటింగ్‌ కు సంబంధించిన వీడియో లీక్‌ అయ్యింది.

పల్లెటూరు వాతావరణంలో మహేష్‌ బాబు టీం చిత్రీకరణ చేస్తున్న సన్నివేశాలకు సంబంధించిన వీడియో బయటకు వచ్చింది. ఎవరో రహస్యంగా ఈ వీడియోను చిత్రీకరించినట్లుగా తెలుస్తోంది. ఇక పల్లెటూరులో పచ్చని పొలాల మద్యలో మీడియాతో మహేష్‌ బాబు మాట్లాడుతున్న సీన్‌ కు సంబంధించిన వీడియో కూడా లీక్‌ అయ్యింది. సినిమాకు సంబంధించిన కీలక సన్నివేశాలు ఇలా సోషల్‌ మీడియాలో లీక్‌ అవ్వడంతో చిత్ర యూనిట్‌ సభ్యులు ఆగ్రహంతో ఉన్నారు. సెట్స్‌ కు ఫోన్‌ లు తీసుకు రాకూడదని, బయటి వారిని అనుమతించొద్దని నిర్ణయించుకున్నారు.

షూటింగ్‌ ముగింపు దశలో ఇలాంటి వీడియోలు సినిమాపై ఆసక్తిని కలిగించడంతో పాటు కొన్నిసార్లు నష్టాన్ని కూడా కలిగిస్తాయి. మహర్షి లీక్డ్‌ వీడియోలు ఎలాంటి ఫలితాన్ని చిత్రానికి మిగల్చనున్నాయో చూడాలి. ఈ చిత్రంలో మహేష్‌ బాబుకు స్నేహితుడిగా అల్లరి నరేష్‌ నటించాడు, పూజా హెగ్డే ఈ చిత్రంలో హీరోయిన్‌ గా నటిస్తున్న విషయం తెల్సిందే. ఏప్రిల్‌ 25న ఈ చిత్రాన్ని విడుదల చేయబోతున్నట్లుగా నిర్మాత దిల్‌ రాజు ఇటీవలే ప్రకటించాడు.